Најави дека на 24 февруари повторно ќе има состанок на техничко ниво. Според него, имајќи предвид дека за превозниците ќе се одложи примената на системот ЕЕС и наместо од април ќе почне да се применува од крајот на септември, има доволно време и доволно начини да се изнајдат финалните решенија и тие да се имплементираат од сите 29 земји членки на шенген-зоната
Превозниците со протестите остварија едно од основните барања, а тоа е започнување дијалог што се води и во негови рамки треба да се изнајдат финални решенија, изјави денеска вицепремиерот и министер за транспорт Александар Николоски од Прилеп.
Николоски ги коментираше обвинувањата на лидерот на Социјалдемократскиот сојуз (СДСМ), Венко Филипче, посочувајќи дека се води црна и гнасна кампања од опозицијата на темата со превозниците.
„Свесен сум дека на Филипче му се ниша позицијата во СДС, ги извртува фактите, ја има практично киднапирано партијата за цели што само тој ги разбира и буквално се однесува како бомбаш самоубиец. Сакајќи да се заштити себеси и сопствената позиција, уништува сè околу себе“,
кажа тој.
Во моментов, како што рече, се води дијалог и има време да се изнајдат финалните решенија за превозниците зашто ќе се одложи примената на системот ЕЕС и наместо од април ќе почне да се применува од крајот на септември.
„Претседателката на Европската комисија кажа дека таков дијалог ќе се случи и презентира документ кој се вика ‘Нова визна стратегија на Европската Унија’, со кој возачите се признати како професионалци. Тоа беше едно од основните барања. И во рамките на овој дијалог што се води во моментов треба да се донесат конечните решенија оти никој никаде, а камоли во систем како ЕУ не очекува дека за две недели сите работи ќе бидат решени. Тоа што го кажав беше дека ЕУ ќе го започне овој дијалог и дека новата визна стратегија е начинот и патеката по која ќе се оди. Така беше, така се случува. Сè друго е извртување на фактите“,
рече тој.
Посочи дека веќе имале еден состанок на политичко и еден на техничко ниво.
Најави дека на 24 февруари повторно ќе има состанок на техничко ниво.
„Има доволно време да се изнајдат финални решенија, имајќи предвид дека за превозниците ќе се одложи примената на системот ЕЕС и наместо од април ќе почне да се применува од крајот на септември. Дотогаш има доволно време и доволно начини да се изнајдат финалните решенија и тие да се имплементираат од сите 29 земји членки на шенген-зоната, што не е мала работа“,
вели Николоски.
Од Министерството за транспорт пред два дена информираа дека во координација со Европската комисија (ЕК) се работи на трајно решение за престојот на превозниците во шенген-зоната.
„Во постојана комуникација сме со превозниците, како и со Европската комисија со цел изнаоѓање решение во рамки на новата визна стратегија која ја промовираше Европската Унија, во која се отвора можноста возачите да бидат третирани како професионалци, како и можностите за друг вид визи“,
соопштија оттаму.