Двајцата американски научници ја добиваат годинашната награда за откритие како се активираат нервните импулси за температура и допир
Нобеловиот комитет започна да ги објавува Нобеловите награди за 2021 година. Оваа година наградата за физиологија и медицина им припаѓа на Дејвид Џулиус и Ардем Патапутиан за нивните откритија во областа на рецепторите за температурата и допир.
„Нашата способност да чувствуваме топлина, студ и допир е клучна за преживувањето и ја поддржува нашата интеракција со светот околу нас. Во секојдневниот живот ги земаме овие чувства здраво за готово, но како се активираат нервните импулси за температура и допир да може да се чувствуваат? Ова прашање го решија годинашните добитници на Нобелова награда. Дејвид Џулиус користел капсаицин, спој од лути чили пиперчиња што предизвикува пецкање за да идентификува сензори во нервните завршетоци на кожата кои реагираат на топлина. Користејќи клетки чувствителни на притисок, Ардем Патапутијан откри нова класа сензори кои реагираат на механички дразби во кожата и внатрешните органи. Овие револуционерни откритија предизвикаа интензивни истражувачки активности што доведоа до брзо зголемување на нашето разбирање за тоа како нервниот систем чувствува топлина, студ и механички стимули. Добитниците открија критични алки што недостигаат во нашето разбирање за сложената интеракција на нашите сетила и околината“,
соопшти Нобеловиот комитет.
Дејвид Џулиус е роден во 1955 година во Њујорк, САД. Докторирал во 1984 година на калифорнискиот универзитет „Беркли“, а бил и постдокторанд на Универзитетот „Колумбија“ во Њујорк. Дејвид Џулиус бил вработен на Универзитетот во Калифорнија, Сан Франциско, во 1989 година, каде што сега е професор.
Ардем Патапутијан е роден во 1967 година во Бејрут, Либан. Во младоста тој се преселил од Бејрут во Лос Анџелес, САД, каде што и докторирал. Бил постдокторанд на Универзитетот во Калифорнија, Сан Франциско. Од 2000 година тој е научник во „Скрипс рисрч“, Ла Џола, Калифорнија, каде што сега е професор. Тој е истражувач во Медицинскиот институт „Хауард Хјуз“ од 2014 година.