Не ми падна на памет дека собирот во кабинетот непосредно пред виталниот состанок за стратегијата за ковид-19 може да значи прекршување на правилата, рече британскиот премиер
Британскиот премиер Борис Џонсон денеска му се извини на парламентот за прекршувањето на правилата за ковид-19 во врска со забавата за неговиот роденден во градината на „Даунинг Стрит 10“, поради што минатата недела полицијата го казни со 50 фунти.
Покрај Џонсон, казна доби и министерот за финансии Риши Сунак кој присуствуваше на забавата.
Пратениците за два дена, в четврток, ќе гласаат за тоа дали Џонсон треба да биде под истрага бидејќи го завел парламентот со постојаното кажување дека ги следел правилата за ковид-19.
„Ја користам оваа прилика на првиот ден на нашето собирање да го повторам моето искрено извинување. Веднаш штом го добив известувањето, ја потврдив грешката и кажав дека луѓето имаат право да очекуваат подобро од нивниот премиер“,
им кажа Џонсон на пратениците.
Тој рече и дека првично не сфатил дека со собирот ги прекршил ковид-протоколите.
„Во тој момент, или подоцна, не ми падна на памет дека собирот во кабинетот непосредно пред виталниот состанок за стратегијата за ковид-19 може да значи прекршување на правилата. Повторувам дека тоа беше моја грешка и се извинувам за тоа, безрезервно“,
рече британскиот премиер.
Предлогот пратениците да дебатираат и гласаат за ова го поднесе лидерот на Лабуристичката партија, Кир Стармер, а беше поддржан и од други опозициски пратеници.