Венс настапил во типичен американски „МАГА“ стил, избегнувајќи да дискутира повеќе на темите за одбраната и безбедноста, кои се основни на конференцијата
Потпретседателот на САД Џеј-Ди Венс на безбедносната конференција во Минхен упати остри критики кон европските влади, обвинувајќи ги дека ја игнорираат волјата на луѓето, поништуваат избори, ги игнорираат верските слободи и не работат за да ја запрат нелегалната миграција.
Како што пренесува „Политико“, Венс настапил во типичен американски „МАГА“ стил, избегнувајќи да дискутира повеќе на темите за одбраната и безбедноста, кои се основни на конференцијата.
Наместо тоа, продолжува магазинот, тој се посветил на културолошки теми, како законите за абортус во Велика Британија и неодамнешните избори во Романија.
„Заканата што најмногу ме загрижува во врска со Европа не е Русија, ниту Кина, ниту кој било друг надворешен фактор. Тоа што ме загрижува е заканата однатре. Тоа е повлекувањето на Европа од некои од фундаменталните вредности што ги споделува со САД“,
рече потпретседателот.
„Политико“ пишува дека веднаш било јасно оти новата администрација е различна од трансатлантски-определената на Џо Бајден.
„Има нов шериф во Вашингтон, и под водство на Доналд Трамп можеби нема да се согласуваме со вашите гледишта, но ќе се бориме за вашето право да ги претставите на јавната сцена, за луѓето да се согласат со нив или да не се согласат. Отфрлањето на луѓето и на нивните грижи, затворањето на медиумите, поништувањето на изборите, не штити ништо. Тоа е најсигурниот начин да се уништи демократијата. Ако владеете во страв од своите гласачи, тогаш Америка не може ништо да стори за вас“,
додаде Венс.
Настапот на Венс, се додава во извештајот од „Политико“, ја замолкнал публиката од политички аналитичари и експерти во одбраната.
Тој, како што пишува, ги обвинил европските влади и европските комесари дека повеќе се заинтересирани да ја ограничат слободата на говорот отколку да ја осигураат безбедноста на своите граѓани.
Ја критикуваше Велика Британија за активистот против абортус Адам Смит-Конор, кој лани беше осуден за блокирање безбедносна зона пред клиника за абортус, каде што се молел.
Упати остри зборови и кон највисокиот суд на Романија, за одлуката да го поништи првиот круг од претседателските избори во ноември минатата година, откако крајнодесничарскиот кандидат Калин Георгеску беше обвинет дека корител нелегална кампања на социјалните мрежи, во „руски стил“.
„Кога гледам како европските судови поништуваат избори, треба да се запрашаме дали се држиме до високите стандарди“,
рече Венс.
Тој ги критикуваше и политиките за миграцијата, тема што беше меѓу доминантните во кампањата на Трамп пред претседателските избори.
Рече дека се молел за жртвите од вчерашниот напад во Минхен, каде мигрант влета со автомобил во толпа и повреди 28 лица.
„Колку пати мора да страдаме и да назадуваме пред да го смениме курсот и да ја поведеме нашата цивилизација во поинаква насока“,
рече Венс, додавајќи дека бројот на мигранти од земји што не се членки на ЕУ се удвоил од 2021 до 2022 година.