„Мислам дека на крајот тие ќе бидат партнери со САД. Можеме да ги направиме многу побезбедни. А тоа може да ги направи и економски постабилни“, изјави американскиот потпретседател при неговата посета на островот
Американскиот потпретседател Џеј-Ди Венс при неговата денешна посета на Гренланд рече дека Данска не инвестирала во безбедноста на островот, истовремено запоставувајќи го, пренесува Асошиејтед прес. Очекува жителите на Гренланд да застанат на страната на американскиот претседател Доналд Трамп, кој сака Соединетите Американски Држави (САД) да го преземат островот и да се согласат на партнерство.
Ваквите забелешки Венс ги даде при посетата на американските војници во вселенската база „Питуфик“ на Гренланд, каде што беше во придружба на својата сопруга и други високи американски функционери.
Веднаш по пристигнувањето, Венс накратко им се обрати на американските војници стационирани во базата, велејќи им дека администрацијата на Трамп е многу заинтересирана за арктичката безбедност.
„Нашата порака до Данска е многу едноставна: Вие не му направивте добра работа на народот на Гренланд. Тоа мора да се промени“,
рече Венс.
Според него, САД немаат друга опција освен да заземат значајна позиција и на тој начин да ја осигурат безбедноста на Гренланд.
„Мислам дека на крајот тие ќе бидат партнери со САД. Можеме да ги направиме многу побезбедни. А тоа може да ги направи и економски постабилни“,
кажа тој.
Данската премиерка Мете Фредериксен го отфрли тврдењето на Венс дека Данска не прави доволно за одбрана на Арктикот, нарекувајќи ја нејзината земја добар и силен сојузник.
Инаку, ова не беше официјална посета на претставници на САД на Гренланд.
Односите меѓу САД и Данска, која важеше за традиционален американски сојузник и членка на НАТО, се заострија поради ставот на Трамп за Гренланд, кој не се откажува од идејата за преземање на островот.