Досега нема потврдени смртни случаи во Англија како последица од омикрон, но околу 40 отсто од заразените во Лондон се со овој сој
Новиот сој на коронавирусот омикрон се шири со исклучителна брзина, така што луѓето треба да добијат дополнителна доза од вакцината, бидејќи двојно вакцинираните лица се ранливи, изјави денеска британскиот министер за здравство Саџид Џавид.
Иако Џавид рече дека досега нема потврдени смртни случаи во Англија, како последица од омикрон, тој додаде дека околу 40 отсто од заразените во Лондон се со овој сој и дека здравствените услуги ќе бидат преоптоварени доколку Владата не преземе мерки.
„Она што го знаеме за омикрон е дека се шири со исклучителна брзина, нешто што досега не сме го виделе, на секои два или три дена бројот на заразени се удвојува. Тоа значи дека се соочуваме со бран на инфекција, повторно сме во трка меѓу вакцини и вируси“,
рече Џавид за Скај њуз.
Во телевизиска изјава, британскиот премиер Борис Џонсон рече дека секој постар од 18 години ќе може да добие трета доза од вакцината до крајот на овој месец. Претходната цел беше крајот на јануари.
„Сега е јасно дека две дози вакцина едноставно не се доволни за да го обезбедат нивото на заштита што ни треба“,
рече Џонсон.