Ако оди се како што е договорено и се одржат предвремени парламентарни избори на 12 април, Парламентот ќе се распушти на 12 февруари, а техничката влада може да се избере истиот ден кога ќе биде констатирана оставката на актуелниот премиер – 3 јануари, вели во интервју за МИА претседателот на Собранието Талат Џафери.
„Бидејќи тоа е работа која што е прифатена од сите, формално не е спорно тоа да се случи на самиот ден 3 јануари, за да може во текот на денот да се спроведуваат сите постапки за седниците кои треба да се одржат тој ден затоа што процедурите предвидуваат оставка на премиерот, констатирање на оставката, известување до претседателот дека владата е во оставка, кој според законот за Влада треба да се определи нов мандатар, да добие мандат, па тој мандатар да даде предлог за министер за внатрешни работи и за труд и социјална политика, за тројцата заменици министри во МВР, во труд и во земјоделие, за да може да се свика седница за нивен избор и со тоа фактички до 24 часот на 3 јануари да се заокружи таа седница и од 4 јануари веќе да функционира техничка влада“, објаснува Џафери.
Џафери овој парламентарен мандат го оценува како можеби најтежок досега, имајќи ги предвид тешките одлуки што требаше да се носат не само оваа година, туку од самиот негов избор наваму. Собранието, според него, работеше под специфични услови, почнувајќи од она што се случи во 2017 година.
„Генерално како мандат е еден од потешките, ако не и најтежок мандат во кој што се одвиваа многу работи којшто сигурно ќе остават историски белег во работата на Собранието. Доста тешки одлуки кои требаше да се реализираат и мислам дека со трпелива работа успеавме да ги надминеме, да ги слушаме сите разлики под однос на дебатата, дадовме соодветно време на сите кои што требаа да учествуваат во таа дебата, соодветно мислам дека се земаа предвид поголемиот дел од укажувањата и од спротивните ставови и со тоа фактички успеавме да го заокружиме носењето на битните одлуки и проекти кои беа пред нас“, оценува претседателот на Собранието.
Како можни технички премиери се споменуваа министерот за внатрешни работи Оливер Спасовски и министерката за труд и социјална политика Мила Царовска, кои со остваката на Заев на 3 јануари ќе ги напуштат функциите.
Заев во петокот најави дека одлуката ќе ја донесат следнава недела, на 27 декември, кога ќе заседваат партиските тела.
„Од тактички причини одлуката ја одложивме за крајот на следната недела. Ќе не разберете затоа што овде се прави договор меѓу власта и опозицијата. Ние не би сакале да истрчуваме со какви било мерки. Имаме доволно време да размислиме. Се работи за дополнителни двајца заменици министри со право на вето во МВР и во Министерството за труд и социјална политика, но и за пополнувањето на испразнетото место потпретседател за економски прашања. Економијата е многу важна сакаме цел тој кабинет да биде пополнет со соодветна личност“, изјави Заев во петокот.