Видете, работата во однос на документите е оперативна надлежност на МВР. И затоа тоа не може да го гледате како дејствување на министерот надвор од она што е определба. Владата има обврска да даде решенија за оние прашања што се во надлежност на Владата, а не може да ги спроведе соодветното Министерство. Така што, работите јас ги гледам во смисла на она што е функционирање на системот. Во крајна инстанца, тоа е одговорност на Министерството за внатрешни работи, вели Џафери во интервју за Дојче веле
Не можам да кажам дека сите прашања поврзани со процедурата за промена на личните документи ќе бидат решени до 12 февруари затоа што од анализите што ги правиме има многу запоставување на процедурите на процесите во подготовка и реализација на процесот на издавање на документите, и во тој контекст сметам дека она што е надлежност на Владата да го регулира со соодветни одлуки, ќе го регулира Владата, вели премиерот на преодната влада Талат Џафери во интервју за Дојче веле.
„Оваа работа не зависи само од министерот (за внатрешни работи), од премиерот или од Владата, ова е конгломерат на обврски од последниот вработен во Министерството (за внатрешни работи) до последниот вработен во Владата и таа работа мора да е искоординирана“,
вели Џафери.
На прашањето дали гледа некоординација со Владата или промоција заради партиски рејтинг во тоа што министерот за внатрешни работи Панче Тошковски веќе презеде некои чекори во врска со смената на личните документи, премиерот Џафери вели дека нема причина постапките на министерот да се гледаат како обид за добивање политички поени.
„Видете, работата во однос на документите е оперативна надлежност на МВР. И затоа тоа не може да го гледате како дејствување на министерот надвор од она што е определба. Владата има обврска да даде решенија за оние прашања кои што се во надлежност на Владата, а кои што не може да ги спроведе соодветното Министерство. Така што, работите јас ги гледам во смисла на она што е функционирање на системот. Во крајна инстанца тоа е одговорност на Министерството за внатрешни работи, одговорност на носителите на функциите во самото Министерство и во администрацијата која што оперативно ги спроведува обврските по однос на издавање и подготовка на документите и на процесот на издавање на документите. Така да нема причина да се гледа како обид за политички поени“,
дециден е Џафери.
Тој оценува дека соработката со министрите од ВМРО-ДПМНЕ е соодветна и колегијална, во смисла на она што се права и обврски на сите членови на Владата и се третираат како членови на Владата без оглед од кој субјект доаѓаат.
„Така што, немам поинаков пристап кон нив, без оглед што се опозициски определени, односно како дел од опозицијата се влезени во Владата како дел од пржинскиот договор. И во тој контекст тие се членови на Владата со исто право и надлежност да спроведуваат она што е работа на Владата. Така да, колегијален е односот како и со сите други членови на Владата“,
вели премиерот во интервјуто за Дојче веле.
На прашањето дали како премиер и како влада ќе преземе можеби некои дополнителни мерки за да се олесни состојбата со обврската за промена на личните документи имајќи предвид дека 12 февруари е близу, а многу луѓе се без патни исправи и дали можеби ќе има некаква комуникација со Грција, Џафери одговара:
„Најпрво ние треба да си преземеме мерки и активности кои се во наша надлежност и во наша одговорност. Не се исклучуваат комуникациите и со сите чинители што можат да го олеснат процесот, но прво битно е дека ние треба да одговориме на нашите обврски од овде за да ги спроведеме нашите обврски. Тоа што не може да се заврши е предмет на размислување и по тој пат да се искомуницираат сите фактори кои што можат да влијаат на средување на оваа состојба и да се исполнат обврските во соодветен рок, време, процедура за да обезбедиме функционалност на сите потреби на луѓето“.
На прашањето дали на 12 февруари Владата има обврска да го информира светот дека досегашните патни исправи повеќе не важат, премиерот вели дека ќе се направат соодветни консултации на ниво на Владата и со меѓународните институции и дека потоа ќе се има конечна одлука дали ќе се пристапи или нема да се пристапи кон таа процедура. Сега, нагласува Џафери, таква одлука не може да се донесе предвреме.
Во однос на тоа каква е неговата оценка за исполнувањето на обврските од Преспанскиот договор од двете страни, Џафери посочува дека засега не може да даде јасна оценка.
„Па јас сум 10. ден на позицијата премиер и навистина не можам да ви дадам јасна и прецизна дефиниција за позитивна или негативна оценка. Во секој случај, во контекст на парламентарната комуникација и соработка мислам дека соработката е коректна па дури над коректна во смисла на позитивниот однос во комуникацијата и во перцепцијата која е направена и меѓуинституционална и меѓуграѓанска. Она што е битно е меѓу граѓаните да има позитивна перцепција за односите“,
истакнува премиерот на преодната влада.