Претседателот на Собранието информирал за надворешно-политичките приоритети на нашата држава и тоа за членството во НАТО и за очекуваното членството во Европската Унија
Претседателот на Собранието Талат Џафери, оствари средба со генералниот секретар на Муслиманската светска лига, Мохамад бин Абдул Карим Ал-Иса, кој е во посета на Северна Македонија.
Џафери, како што информираат од неговиот кабинет, ја поздравил мисијата и напорите на Ал-Иса за унапредување на меѓуверскиот дијалог, верската толеранција и мирната коегзистенција на глобално ниво. Тој, исто така, нагласил дека Северна Македонија е мултиетничка, мултирелигиска и мултикултурна секуларна држава, а почитувањето на различните религии, културата, јазикот и етничкото потекло претставуваат камен темелник на безбедноста и на просперитетот на државата.
На средбата, Џафери го информирал за надворешно-политичките приоритети на нашата држава и тоа за членството во НАТО, цел која ја остваривме во март 2020 година и членството во Европската Унија, цел на која Собранието континуирано работи за да испорача конкретни резултати и да ги исполни европските аспирации на граѓаните.
Во однос на регионалната соработка и односите со соседите, Џафери, се вели во соопштението, истакнал дека континуирано се стремиме да создадеме позитивна атмосфера и билатералните прашања да ги решаваме во духот на добрососедството и основните европски вредности.
Генералниот секретар на Муслиманската светска лига, Ал-Иса, нагласувајќи дека различностите се богатство, искажал пофалби за меѓуетничката и меѓурелигиската соработка во Северна Македонија и ја поздравил важната улога на Собранието во градењето соживот, која може да послужи како пример во регионот и пошироко.
Тој, се наведува во соопштението, се осврна и на борбата против екстремизмот и радикализмот и нагласи дека за нивно сузбивање најважни се семејството, образованието и институциите. Потенцирајќи дека Мусламанската светска лига придава големо значење на образованието на децата како најсигурна заштита од екстремизам и радикализам, информираше дека на конференциите кои оваа невладина организација ги организира, се канат претставници на Ватикан, на будистичките организации, на еврејските религиски организации и заеднички работат на градење мостови помеѓу заедниците на локално, регионално и глобално ниво. Тој истакна дека Муслиманската светска лига има одлична соработка со сите земји од Западен Балкан и продолжува посветено да работи на градењето нови партнерства меѓу различните заедници, вери и нации, се вели во соопштението.