Политичката партија Левица на 7 октомври до Собранието поднесе иницијатива за покренување задолжителен и дополнителен референдум на државно ниво на референдумско прашање „Дали сте за продолжување на преговорите со ЕУ со прифаќање на собраниските заклучоци од 16 јули 2022 година?”. Партијата собрала 750 потписи кои со останатите материјали ги предаде во собраниската архива
Барањето за одржување референдум поднесено од политилката партија Левица не е подготвено во согласност со собранискиот Деловник, а прашањето е несоодветно поставено, смета претседателот на Собранието Талат Џафери.
„Испитувајќи го вашето Барање за покренување на граѓанска иницијатива на државно ниво за распишување на задолжителен дополнителен референдум, увидов дека барањето не е подготвено во согласност со одредбите на Деловникот, а особено член 135 од истиот, а и поставеното прашање упатува на несоодветно поставено прашање од причина што, заклучоците не се општ правен акт, закон или устав, истите по негова природа и содржина се став кој ја насочува Владата на Република Северна Македонија во нејзиното постапување“,
наведе Џафери во соопштение како одговор на граѓанската иницијатива за одржување референдум од Левица.
Претседателот на Собранието воедно бара во предвидениот рок предлагачот да го усогласи барањето со одредбите од Деловникот на Собранието.
„Имајќи го предвид горенаведеното, а согласно член 136 од Деловникот на Собранието на Република Македонија, кој гласи: ‘Ако предлогот на закон не е подготвен во согласност со одредбите на овој Деловник, претседателот на Собранието, пред да го достави на пратениците, ќе побара од предлагачот да го усогласи со одредбите на овој Деловник. Ако предлагачот не го дополни предлогот на законот во рок од 15 дена од барањето на претседателот на Собранието, се смета дека предлогот на законот не е поднесен’, која одредба соодветно се применува и за сите други поднесоци. Барам во предвидениот рок, Вашето барање да го усогласите со одредите на Деловникот на Собранието на Република Македонија“,
наведува Џафери.
Политичката партија Левица на 7 октомври до Собранието поднесе иницијатива за покренување задолжителен и дополнителен референдум на државно ниво на референдумско прашање „Дали сте за продолжување на преговорите со ЕУ со прифаќање на собраниските заклучоци од 16 јули 2022 година?”. Партијата собрала 750 потписи кои со останатите материјали ги предаде во собраниската архива.
Лидерот на Левица Димитар Апасиев на прес-конференција најави целосна блокада на Собранието доколку спикерот Талат Џафери ја отфрли и оваа иницијатива.
На прашањето дали очекува претседателот на Собранието да ја прогласи и оваа иницијатива за неуставна, Апасиев рече дека такво нешто не очекува затоа што тој нема такви ингеренции.
„Доколку во некое сценарио тоа се случи, ние најавивме дека целосно ќе го блокираме Собранието и мислам дека тој нема да се дрзне да го направи тоа. Ќе видиме, затоа што не можеме да претпоставиме, тој силеџиски ги толкува и Уставот и Деловникот. Тој не е надлежен за тоа што го прави, тој е надлежен само да ја прими, да види титулари, адресари, дали е тоа правилно, дали има минимум законски потписи и потоа ја проследува до комисии. Тој не е надлежен да се впушта во оцена на материјалното на прашањето, но дури и да го направи тоа, прашањето е така интелигентно срочено што го следи примерот од Преспанскиот договор“,
рече Апасиев.
Претседателот на Собранието Џафери на 13 септември ја отфрли иницијативата на опозициската ВМРО-ДПМНЕ за референдум за престанок на важењето на Законот за ратификација на Договорот за пријателство, добрососедство и соработка со Бугарија, образложувајќи дека е противуставна и оти меѓународните договори што се ратификувани во согласност со Уставот се дел од внатрешниот правен поредок и не можат да се менуваат со закон.
Од ВМРО-ДПМНЕ тогаш оценија дека иницијативата е во сoгласност со членот 24 од Законот за референдум и порачаа дека Џафери нема основа да ја отфрли, додека од владејачката СДСМ ја поддржаа одлуката на Џафери поради тоа што и тие ја сметаат за неуставна.