Откако синоќа ја исцрпија расправата, која повеќе се сведуваше на партиски препукувања отколку на суштинска дебата, пратениците треба да гласаат за предлог-законот за јавно обвинителство. Седницата е закажана за во 13 часот, а освен оваа точка, на дневен ред се и измените на Законот за Советот на јавни обвинители.
Собранискиот спикер Талат Џафери за „360 степени“ вели дека очекува дојава од пратениците дали е обезбедно двотретинско мнозинство за законот за јавно обвинителство да го стави на гласање. Доколку нема услови денеска, вели дека гласањето ќе се одложи за утре, пред седницата за распуштање на парламентот.
„Дебата за законот за јавно обвинителство е завршена. Денеска ќе се расправа за Законот за Советот на јавни обвинители, по што ќе се гласа, бидејќи законите еден со друг се поврзани. Ако добијам информација дека е обезбедно двотретинско мнозинство за Законот за јавно обвинителство, ќе го ставам на гласање денеска. Ако не, ќе закажам седница утре во 11 часот, пред седницата за распуштање на парламентот“,
изјави Џафери.
Претставниците од СДСМ синоќа изразија надеж дека ќе се донесат сите закони што ги сметаат за приоритетни, а потоа ќе се распушти Собранието и ќе се оди на избори. Поддршка вети и ДУИ. ВМРО-ДПМНЕ, пак, останува на ставот дека власта брза да го донесе овој закон за да се заштити од, како што велат, криминалите кои што ги има направено.