Владата, а не Собранието, е надлежна за постапување по иницијативата на пратеничката група на ВМРО-ДПМНЕ и коалицијата за ратификацијата на Протоколот за членство во НАТО, изјави попладнево претседателот на парламентот Талат Џафери.
Група пратеници од ВМРО-ДПМНЕ и коалицијата до него доставиле барање за иницирање, односно за препраќање до Владата на иницијатива за доставување предлог-закон за ратификација на договорот за НАТО пред да заврши постапката во Шпанија, последната земја членка на НАТО која не го ратификува овој Протокол.
„Од формален аспект, еден документ што влегува во Собранието во соодветна процедура, моја обврска е да го разгледам актот соодветно и по однос на надлежностите да постапувам. Имајќи предвид дека Собранието врз основа на членовите на Деловникот на кои се повикуваат пратениците ги нема тие надлежности, сметам дека е соодветно актот, како и при сите други случаи за кои Собранието не е надлежно да постапува, да се препрати до надлежниот орган на кој се однесува проблематиката, во конкретниов случај до Владата на Република Северна Македонија“, објасни Џафери.
Во иницијативата што ја поднесе ВМРО-ДПМНЕ се вели дека целта е Северноатлантскиот договор и Пристапниот протокол за членство во НАТО да бидат ратификувани во нашето Собрание пред неговото распуштање поради предвремените парламентарни избори.
Од ВМРО-ДПМНЕ се повикуваат на случајот со влезот на Црна Гора во НАТО, кога тамошниот парламент предвремено ги ратификуваше овие документи, а Холандија и Шпанија ја направија ратификацијата на Протоколот еден месец подоцна.