Седум други македонски државјани, туристи, кои биле затечени во Витлеем кога Хамас го нападна Израел, успешно ја поминале границата со Јордан, каде што биле прифатени од македонската почесна конзулка во земјата и се очекува во наредните денови да се вратат во Македонија
По вчерашниот напад на Хамас во јужниот дел на Израел, бројни македонски граѓани се јавиле во амбасадата на С Македонија во Тел Авив барајќи евакуација и засолниште. Денеска, девет туристи од Велес се евакуирани во комуникација со албанските власти, и наскоро тие се очекува да слетаат на аеродромот во Тирана, од каде што со организиран транспорт ќе бидат префрлени дома.
„Претходно, седум наши државјани, туристи кои беа затечени во Витлеем, успешно ја поминаа границата со Јордан, каде беа прифатени од нашата почесна конзулка; сега се на безбедно и во наредните денови се очекува нивно упатување кон дома. Утрово, четворочлено семејство затекнато во Тел Авив, преку комерцијален лет се упати кон Истанбул, од каде исто така ќе го продолжи патувањето кон дома“,
се вели во соопштението на МНР.
Амбасадата во Тел Авив останува во контакт со сите останати наши државјани кои се имаат пријавено и побарале асистенција при нивното напуштање на Израел. Меѓу нив се и 11 градежни работници кои се затечени во Рамала (Западен Брег).
Министерството за надворешни работи, преку кризниот штаб и дипломатско-конзуларната мрежа, воспоставило директна комуникација и координација со земјите од регионот на Блискиот Исток и Југоисточна Европа, со цел искористување на сите расположливи летови и враќање на македонските државјани, за што е пратена и итна инструкција до дипломатско-конзуларната мрежа на С Македонија, во двата региона.
Според проценки на кризниот штаб, на територијата на Израел и загрозените подрачја се проценува дека престојуваат меѓу 100 и 200 наши државјани, кои МНР очекува да се пријават или да бидат пријавени од нивните блиски во контакт-центрите.
За повеќе информации, на располагање се СОС-дежурните телефони на Министерството за надворешни работи: 075/273-732 и 075/268-736, како и дежурниот телефон на Амбасадата во Тел Авив: +972-54-926-7378
.