Како што најави министерката за образование, формалното образование за учениците во болница ќе се одвива на два начини, од кои едниот е синхроно, кога тие ќе можат да се вклучат онлајн додека траат часовите. Вториот начин е асинхрон, бидејќи тие нема да можат секогаш да се вклучат директно на часовите, па наставникот ќе му испорачува материјали на ученикот и ќе му задава задачи
Децата што повеќе од три недели се лекуваат на Детската клиника во Скопје од септември ќе можат да бидат дел од формалното основно образование, односно да следат часови онлајн, со цел да немаат прекин во наставно-образовниот процес. Ова денеска го најави министерката за образование, Весна Јаневска, промовирајќи го проектот за формално основно образование за децата што се долготрајно болничко лекување на Клиниката за детски болести во Скопје.
Покрај Министерството за образование, според Јаневска, во изработка на проектот учествуваат и Министерството за здравство и Здружението САНО, што им помага на децата болни од канцер или од други малигни и хронични болести.
„Покрај здравствените предизвици, децата што лежат на Детската клиника се соочуваат и со образовен предизвик. Тие досега немале можност да го продолжат своето образование додека се наоѓаат на подолготрајно болничко лекување. Тоа е сериозен пропуст и претставува дискриминација на овие деца“,
рече Јаневска, која денеска ја посети Клиниката за детски болести во Скопје.
Ова системско решение, како воведување на формално образование за овие деца, според министерката ќе се одвива на два начини, од кои едниот е синхроно, кога тие ќе се вклучат онлајн додека траат часовите. Вториот начин е асинхрон, бидејќи тие нема да можат секогаш да се вклучат директно на часовите, па наставникот ќе му испорачува материјали на ученикот и ќе му задава задачи.
Во зависност од здравствената состојба на детето, наставникот ќе може да организира и индивидуална настава за ученикот, преку некоја дигитална алатка.
Ќе се користат истите дигитални алатки што ги коростат и останатите ученици, како ЕДУИНО и платформата за дигитални интерактивни учебници.
Јаневска посочи и дека одреден број наставници, што имаат такви дечиња во одделението, веќе се на обука, за од 1 септември да можат да почнат да работат.
„Децата болни од канцер не смеат да бидат изолирани од општеството и да имаат прекин во нивниот живот од секојдневните потреби. Како општеството сме должни да им помогнеме во надминување на овој предизвик во кој се борат со своите родители. Со овој проект, градиме едно емпатично и сериозно одговорно општество“,
кажа министерката.
Министерот за здравство Азир Алиу рече дека оваа иницијатива е чекор кон целосна инклузија на болните деца и нивно побрзо враќање во училишните клупи.
„Најважна е целосната грижа за децата, не само нивното оздравување, туку и нивниот образовен и психосоцијален развој“,
кажа Алиу.
За директорот на Клиниката за детски болести, Реџеп Мемеди, вклучувањето на децата од болница во формалното образование значи половина здравје, односно полесно поминување на долготрајниот пат на лекување.
Во моментов, како што рече директорот на Детската клиника има околу 20 деца што се лекуваат од малигни заболувања.
Понекогаш третманот на овие деца трае и до две години, во зависност од самата патологија, а првите шест месеци, тие се проморани да бидат постојано на Клиниката.