Освен во Нови Сад, комеморативни собири се одржуваат и во други градови во Србија
Во храмот „Свети Сава“ во Белград денеска се одржа парастос за жртвите од трагедијата со кој служеше поглаварот на Српската православна црква (СПЦ), патријархот Порфириј. На служењето на парастосот присуствуваа и српскиот претседател Александар Вучиќ, премиерот Ѓуро Мацут и претседателката на српскиот парламент Ана Брнабиќ
Повеќе од десет илјади граѓани од цела Србија попладнево пристигнаа пред Железничката станица во Нови Сад и со 16-минутен молк им оддадоа почит на 16-те жртви во трагедијата што се случи на денешен ден минатата година.
Симболично, граѓаните се собраа на 16 локации во Нови Сад, од каде што пристигнаа до железничката станица, а во 11:52 часот – времето кога минатата година се урна бетонската натстрешница – им оддадоа почит на трагично загинатите. По секоја измината минута од 16-минутниот молк, беше пуштан по еден црвен балон.
На местото на трагедијата граѓаните положуваат цветни венци и палат свеќи.
Освен во Нови Сад, комеморативни собири денеска се одржуваат и во други градови во Србија.
Во храмот „Свети Сава“ во Белград денеска се одржа парастос за жртвите од трагедијата со кој служеше поглаварот на Српската православна црква (СПЦ), патријархот Порфириј.
„Господ нека им дарува царство небесно, а на нивните роднини, на сите нивни блиски пријатели, утеха и надеж, воскресение и вечен живот“,
рече спрскиот патријарх Порфириј, читајќи ја молитвата за покој на жртвите.
На служењето на парастосот во храмот „Свети Сава“ присуствуваа српскиот претседател Александар Вучиќ, премиерот Ѓуро Мацут и претседателката на српскиот парламент Ана Брнабиќ, како и голем број граѓани.
„Во овој тажен момент, најважно е Србија да биде достоинствена и обединета. Ве молам да покажеме почит и внимание едни кон други, бидејќи само на овој начин можеме да ја зачуваме општествената нишка што нè поврзува. Денес е денот кога треба без груби зборови и поделби, тивко да се молиме за жртвите. Нека тагата на семејството нè обедини, а не да нè раздели. Нека мирот и одговорноста нè водат, а вистината ќе ја бараме во институциите, трпеливо и со целосно почитување“,
порача Вучиќ, додавајќи дека Србија ќе продолжи да се гради во земја во која безбедноста, одговорноста и грижата за луѓето се на прво место.