Протестот доаѓа откако претседателот, во интервју на Канал 5, го коментираше судскиот процес за терористичко загрозување на уставниот поредок и безбедноста
Помала група демонстранти, кои се претставуваат како Организациски совет за протести за политички монтирани случаи, денеска побараа претседателот на државата Стево Пендаровски да не ги штити, како што велат, „терористите од 27 април“.
На патот кон претседателската вила на Водно тие наидоа на полициски кордон, а во изјава за медиумите обвинија дека претседателот ѝ служи само на македонската страна, а никогаш не коментирал политички монтирани случаи против Албанци.
„Се собравме да го повикаме Пендаровски да не ги штити терористите зашто демократијата не дозволува такво нешто“,
изјавиле демонстрантите, пренесува Алсат ТВ.
Нивниот протест доаѓа откако претседателот, во интервју на Канал 5, го коментираше судскиот процес за терористичко загрозување на уставниот поредок и безбедноста во врска со настаните од 27 април 2017 година.
„Јас првично ги прашував луѓето околу мене за какво кривично дело се гонат. Јас знам дека такво кривично дело, мислам таква формулација, немаше на времето ниту во бивша Југославија, ниту во 90-тите години. Тоа е подоцна прифатено. Бидејќи јас нешто знам околу тероризмот и околу безбедносните проблеми и дилеми, тврдам дека тие луѓе што влегоа не беа терористи“,
изјави Пендаровски.
Потоа, во одговор за државната агенција МИА на прашање дали планира помилувања во врска со овој настан, од кабинетот на Пендаровски посочија оти тој сугерирал дека доколку некој поседува нови докази, кои можат битно да влијаат врз исходот на постапката, потребно е да ги искористи законски гарантираните вонредни правни лекови што потенцијално може да доведе до обновување на постапката.
„За да не се политизира целата постапка, секој што евентуално поседува нови докази треба да ги приложи до судот, а не на настанот да му дава политички квалификации. Како легалист, претседателот Пендаровски смета дека тоа е единствениот правен пат за да се разрешат сомневањата каде што тие постојат“,
рекоа од претседателскиот кабинет.