Освен Шокаровски, Демири рече дека денеска ја разрешил и раководителката на Програмата за превенција од кардиоваксуларни заболувања, Александра Ефтимова
Околу тоа кој ќе биде новиот директор на Кардиохирургија, Демири рече дека таму треба да се назначи експерт однадвор, кој е поврзан со кардиохирургија или со васкуларна хирургија и ако треба тој да одлучува тоа нема да биде вработен во Клиника за кардиохирургија, туку ќе биде однадвор
Директорот на Клиниката за кардиохирургија, д-р Марјан Шокаровски, денеска е разрешен од функцијата. Министерот за здравство Илир Демири рече дека за разрешувањето на Шокаровски има две причини.
Според податоците што стигнале до него, како што рече, имало 170 пациенти кои не се внесени регуларно во „Мој термин“ и немаат отпусно писмо или прилог кон умреница, а таквата бројка Демири вели дека може да ја промени и вредноста на исходот.
„Имаше информации дека е зголемена смртноста на Клиниката за кардиохирургија. Оформив комисија и наредив да се испитаат овие информации. Извештајот што го добив нема сигнификантна поврзаност апропо инсинуациите дека е зголемена смртноста. Меѓутоа има друг податок кој денеска стигна до мене. Има 170 пациенти кои не се внесени регуларно во ’Мој термин’ и немаат отпусно писмо или прилог кон умреница и таквата бројка сигурно може да ја промени и вредноста на исходот. Затоа денеска одлучив да го суспендирам медицинскиот директор на Клиниката, д-р Шокаровски“,
рече Демири на денешната прес-конференција.
Другата причина за разрешување на директорот, според Демири, се крајно нарушените меѓучовечки односи во таа институција.
Околу тоа кој ќе биде новиот директор, Демири рече дека тоа треба да биде експерт што ќе дојде однадвор.
„Бидејќи сум министер во заминување и сакав да го одложам ова и да ја спроведе постапката наредниот министер или јас по некоја случајност ако продолжам да бидам. Таму директор треба да се назначи некој експерт кој е однадвор. Тоа треба да е некој што е поврзан со кардиохирургија или со васкуларна хирургија и ако јас одлучувам нема да биде вработен во Клиника за кардиохирургија, туку ќе биде однадвор. Уште денеска оформив нова комисија за програмата за превенција од превенција од кардиоваскуларни заболувања и ќе побарам светски експерти во Германија, Италија, Швајцарија со кои ќе се договориме да дојдат“,
додаде Демири.
Освен Шокаровски, Демири рече дека денеска ја разрешил и раководителката на Програмата за превенција од кардиоваксуларни заболувања, Александра Ефтимова.
„Во С Македонија се одвојуваат средства од буџетот од 2011 година со Програмата за превенција од кардиоваскуларни заболувања која е наменета за светски познати експерти кои се дел од кардиохирушката област да се како супервизори и директни учесници. Дневница за еден таков експерт е 700 евра“,
рече Демири.
Тој додаде дека од Ефтимова побарал извештај кои се тие светски експерти за кои рече дека доаѓаат од Република Србија од центарот Дедиње, но бидејќи не го добил одлучил да ги разреши неа и комисијата.
„Не знам дали овие светски познати експерти кои доаѓаат на Кардиохирургија дали имаат лиценци и дали ги исполнуваат условите, тоа допрва треба да видам“,
рече тој.
На новинарско прашање дали овие 170 неевидентирани луѓе на Кардиохирургија биле оперирани фантомски без да бидат внесени во систем, дали биле оперирани, а потоа се умрени и не се внесени, Демири рече дека тие не се умрени, дека нема податоци и оти само знае дека за 170 пациенти фалат податоци.
„Затоа тоа ќе оди во Обвинителството и ќе ги испита сите овие недостатоци“,
додаде тој.
Прашан дали во извештајот е констатирано дека процентот на смртноста на државната Клиника за кардиохирургија е зголемен меѓу 25 и 40 отсто, Демири рече дека во извештајот што го има нема некои позначајни отстапувања на смртноста, меѓутоа статистичката анализа се базира врз податоците кои се вметнати.
„Анализата е според податоците на ’Мој термин’. Другите податоци што ги добив денеска се нешто друго и за тоа треба да се спроведе нова анализа, да се направи нова статистичка анализа и потоа да се даде мислење. Ако продолжам да бидат министер за здравство, ќе бидам транспарентен, ако не најодговорно истите овие констатации и сомнежи ги пријавувам во обвинителство“,
одговори Демири.
На прашањето како дознал дека има пациенти што не се во „Мој термин“, Демири рече дека не може сите работи да ги сподели со јавноста.