Бугарското собрание вчера усвои декларација со која остро го осуди насилството над македонските Бугари во РСМ. Бугарските пратеници им наложија на македонските институции да донесат системски мерки за да запре говорот на омраза против Бугарија во земјава. Во декларацијата се осудува, како што велат, „злосторството направено врз Пендиков и за одлуките за ограничување на дејноста на бугарските здруженија“
Декларација што вчера ја усвои бугарското собрание, а со која се „осудува антибугарската реторика во Северна Македонија“, не е во согласност со договорената политика за унапредување на меѓусебните односи, изјави денеска премиерот Димитар Ковачевски одговарајќи на новинарски прашања при посетата на компанијата „Виталиа“.
„МНР имаше официјална реакција. Прво, со жалење и Министерството и јас констатираме дека собраниската декларација за наводна ескалација на агресивни антибугарски активности во Северна Македонија што се усвои на последниот ден од работата на собранието на Бугарија, пред распишување на парламентарните избори не соодветствува на договорената политика за унапредување на меѓусебните односи преку заемно уважување и почитување и укажува на отсуство и волја за нејзино спроведување“,
рече Ковачевски.
Според него, со оглед на тајмингот на усвојување на декларацијата, таа може исто така да оди само во прилог на провокаторите чија цел е да предизвикаат политички активности што негативно влијаат на односите помеѓу двете држави и со тоа ги минираат напорите за враќање на конструктивната патека и правење партнерски односи помеѓу двете држави.
„Северна Македонија во изминатиот период преку конкретни проекти и активности покажа дека посветено работи на спроведувањето на Договорот за пријателство и добрососедство и соработка со Бугарија. Содржините што се наведени за постоење системски проблеми со правата и безбедноста на етничките Бугари во Северна Македонија, целосно се косат со институционално етаблираните факти од релевантни меѓународни институции кои го следат спроведувањето на човековите права на сите етнички заедници во Северна Македонија, вклучително и на бугарската. Тука би додал дека ние како држава сме веројатно држава во Европа па дури и во пошироки рамки која на највисоко ниво институционално, законски и процедурално ги има издигнато правата на етничките заедници во државата“,
нагласи тој.
Исто така, додаде премиерот, и МНР и поголем број други државни институции во повеќе наврати посочија дека Законот за фондации и здруженија не е насочен против здружување на ниту една етничка заедница туку против принципот здружение на граѓани да носат имиња на контроверзни личности кои претставуваат провокација, не само за етничките Македонци туку и за сите други граѓани што живеат во Северна Македонија.
„И затоа во тој контекст не постои никаква правна основа ниту пак сериозен аргумент да се поврзе работата на Историската комисија со измените на Законот за здруженија и фондации, бидејќи таа – Историската комисија ќе ја продолжи својата работа врз научно аргументирани и потврдени факти и нема никаква допирна точка со условите под кои се формираат и функционираат здруженијата на граѓани и фондации. Условот за носење на одлуки во Историската комисија е консензус на седум професори по историја на македонска страна и на седум професори по историја од бугарска страна. Без еден потпис нема договорено решение за ништо“,
рече Ковачевски.
Премиерот нагласи дека Северна Македонија не преговара со Бугарија за влез во ЕУ.
„Ние преговараме со 27 земји членки и Европската комисија за ЕУ и сме должни да ги спроведуваме обврските во однос на скрининг процесот со ЕУ којшто тече во најдобар ред. Остануваме исто така на ставот дека за случајот и за други случаи на провокации со физички напади коишто се случија во нашата држава институциите реагираа соодветно. Сторителите на прекршоците се приведени и се водат истражни дејствија коишто се во тек и коишто се одвиваат неселективно по ниту една основа. И исто така, сите овие настани беа осудени од сите државни претставници на државата. Оттука, многубројните изјави за вакви случаи сега веќе преточени и во содржината на декларацијата во бугарското Собрание ги сметам за преувеличени и неосновани кои на ниту еден начин не соодветствуваат на реалноста“,
изјави премиерот.
Во однос на тоа дали стравува од нова бугарска блокада, тој вели дека она што треба да правиме е да работиме напорно за да ги исполниме критериумите на ЕУ за полноправно членство.
Бугарското собрание вчера усвои Декларација со која остро го осуди насилството над македонските Бугари во РСМ. Бугарските пратеници им наложија на македонските институции да донесат системски мерки за да запре говорот на омраза против Бугарија во земјава. Во декларацијата се осудува, како што велат, „злосторството направено врз Пендиков и за одлуките за ограничување на дејноста на бугарските здруженија“. Според нив, „ако со ескалацијата на антибугарската кампања се загрози процесот на менување на Уставот, тоа ќе се одрази и врз интеграцискиот пат на Северна Македонија“.
На ова синоќа реагираше македонското МНР, кое со жалење констатира дека собраниската декларација за наводна „ескалација на агресивни антибугарски активности во Република Северна Македонија“ не соодветствува со договорената политика за унапредување на меѓусебните односи преку заемно уважување и почитување и укажува на отсуство на волја за нејзино спроведување.