Лидерите велат дека безбедноста на Арктикот мора да се постигне колективно со сојузниците на НАТО, вклучувајќи ги и САД
Лидерите на Франција, Германија, Италија, Полска, Шпанија, Велика Британија и Данска денеска издадоа заедничко соопштение за Гренланд, во која се наведува дека арктичката територија ѝ припаѓа на Данска.
„Гренланд им припаѓа на неговите луѓе. Данска и Гренланд, и само тие, треба да одлучуваат за прашања што се однесуваат на Данска и Гренланд“,
се вели во соопштението.
Joint Statement on Greenlandhttps://t.co/ORMWHpKEJt pic.twitter.com/wu1SdF1INN
— Statsministeriet (@Statsmin) January 6, 2026
Лидерите велат дека безбедноста на Арктикот мора да се постигне колективно со сојузниците на НАТО, вклучувајќи ги и САД.
„Безбедноста на Арктикот мора да се постигне колективно, во соработка со сојузниците на НАТО, вклучувајќи ги и САД, преку почитување на принципите на Повелбата на ООН, вклучувајќи го суверенитетот, територијалниот интегритет и неповредливоста на границите. Ова се универзални принципи и ние нема да престанеме да ги браниме“,
пишува во соопштението.
Безбедноста на Арктикот, велат лидерите, останува клучен приоритет за Европа и е клучна за меѓународната и трансатлантската безбедност.
„НАТО јасно стави до знаење дека арктичкиот регион е приоритет и европските сојузници се засилуваат. Ние и многу други сојузници го зголемивме нашето присуство, активности и инвестиции, за да го одржиме Арктикот безбеден и да ги одвратиме противниците. Кралството Данска – вклучувајќи го и Гренланд – е дел од НАТО“,
додаваат лидерите во соопштението.
САД, се додава во соопштението, се клучен партнер во овој напор, како сојузник на НАТО и преку договорот за одбрана од 1951 година меѓу Кралството Данска и Соединетите Американски Држави.
Откако американскиот претседател Доналд Трамп повторно се закани дека ќе го преземе Гренланд, данската премиерка Мете Фредериксен рече дека нападот на САД врз сојузник на НАТО би значел крај и на воениот сојуз и на „безбедноста по Втората светска војна“.
Фредериксен, во изјава за данската телевизиска мрежа ТВ2, вели дека секој напад на САД врз сојузник на НАТО би бил крај на сè.
Коментарите на Фредериксен доаѓаат и откако премиерот на Гренланд, Јенс-Фредерик Нилсен, даде изјава во која го повика Трамп да се откаже од своите „фантазии за анексија“ и ги обвини САД за „целосно и крајно неприфатлива“ реторика, изјавувајќи „Доста е“.
Реакциите на Фредериксен и на Нилсен доаѓаат и откако сопругата на помошник-шефот на кабинет на Белата куќа, Кејти Милер, објави на социјалните мрежи мапа на Гренланд покриена со американско знаме, а во описот пишува „наскоро“.