Данското министерство за одбрана соопшти дека на Гренланд ќе биде изведена воена вежба во рамки на која веднаш ќе бидат распоредени авиони, поморски средства и војници. Германија, Шведска, Франција и Норвешка веќе потврдија дека, на барање на Данска, испраќаат војници на Гренланд во рамки на операцијата „Арктичка издржливост“
По сè поизразените напори на американскиот претседател Доналд Трамп за заземање на Гренланд, кој е автономна данска територија, Данска објави дека го засилува военото присуство на островот со своите сојузници.
„Безбедноста на Арктикот е од клучно значење за Кралството и нашите арктички сојузници и затоа е важно во тесна соработка со сојузниците, дополнително да ја зајакнеме нашата способност да дејствуваме во регионот. Данските одбранбени сили, заедно со неколку арктички и европски сојузници, во наредните недели ќе истражат како може да се спроведе зголемено присуство и вежбовна активност во Арктикот“,
изјави данскиот министер за одбрана Троелс Лунд Поулсен.
Од данското министерство за одбана соопштија дека во рамки на воените вежби, на Гренланд веднаш ќе бидат распоредени авиони, поморски средства и војници.
Германија, Шведска, Франција и Норвешка веќе потврдија дека испраќаат војници на Гренланд.
Министерството за одбрана на Германија соопшти дека на Гренланд денеска се испраќа тим од 13 воени лица кои ќе бидат на, како што се наведува, истражувачка мисија заедно со други партнерски земји, на покана на Данска.
Дека испраќа војници на Гренланд потврди и шведскиот премиер Улф Кристерсон.
„На Гренланд пристигнуваат офицери од шведските вооружени сили. Тие се дел од група од неколку сојузнички земји. Заедно ќе ги подготват претстојните чекори во рамките на данската вежба операција ‘Арктичка издржливост’. На барање на Данска, Шведска испраќа персонал од вооружените сили“,
напиша Кристерсон во објава на Икс.
Några officerare från den svenska Försvarsmakten anländer idag till Grönland. De ingår i en grupp från flera allierade länder. Tillsammans ska de förbereda kommande moment inom ramen för den danska övningen Operation Arctic Endurance. Det är på förfrågan från Danmark som Sverige…
— Ulf Kristersson (@SwedishPM) January 14, 2026
Францускиот премиер Емануел Макрон потврди дека првите француски војници веќе се на пат кон Гренланд.
„На барање на Данска, одлучив Франција да учествува во заедничките вежби организирани од Данска во Гренланд, операција ‘Арктичка издржливост’. Првите француски воени сили се веќе на пат. Ќе следат и други“,
објави Макрон на Икс.
À la demande du Danemark, j’ai décidé que la France participera aux exercices conjoints organisés par le Danemark au Groenland, l’Opération Endurance Arctique.
— Emmanuel Macron (@EmmanuelMacron) January 14, 2026
De premiers éléments militaires français sont d'ores et déjà en chemin. D'autres suivront.
Норвешкото министерство за одбрана потврди дека и Норвешка испраќа двајца војници на Гренланд.