Претседателката на Сојузот на стопански комори Данела Арсовска пред два дена објави дека влегува во трката за градоначалник на Скопје, како независна кандидатка, а по информациите што кружеа во јавноста дека таа ќе биде кандидатка на опозициската ВМРО-ДПМНЕ
Независната кандидатка за градоначалничка на Град Скопје, Данела Арсовска, вечерва на Фејсбук објави дека ги собрала потребните потписи за нејзината кандидатура.
„Денешниот ден го завршуваме со собрани потписи за мојата кандидатура. Ви ветувам дека заедно ќе го направиме градот метропола со која ќе се гордееме. За Скопје од нас, за наше Скопје. Време е за брзи и ефикасни решенија за нашиот град, бидејќи сите сакаме да живееме во убав град“,
напиша Арсовска.
Таа вели дека секоја поддршка е добредојдена.
„Само добар менаџер може да го спаси Скопје од сивилото. Доста ни е од приказни дека требаат години да се смени сегашната стагнација на градот. Потребни се луѓе кои се енергични, со искуство и со јасна визија каде оди градот. Доста е од големи неисполнети ветувања, секој проект се завршува навреме ако е реален и издржан. Затоа повторувам, за две години можни се проекти и тие ќе бидат остварени. Секој што работел со мене знае дека во секој проект давам 100 отсто од својата енергија за да успее“,
напиша Арсовска.
Претседателката на Сојузот на стопански комори, Данела Арсовска, пред два дена објави дека влегува во трката за градоначалник на Скопје, како независна кандидатка, а по информациите што кружеа во јавноста дека таа ќе биде кандидатка на опозициската ВМРО-ДПМНЕ.
Опозициската ВМРО-ДПМНЕ пред десетина дена утврди неколку десетици кандидати за градоначалник, но не и за градот Скопје. На тогашната прес-конференција не беше потврдено дека Арсовска е фаворит на опозицијата за кандидатурата за главниот град.