Според опозицијата, Општината Аеродром е во целосен распад, диви депонии има на секој чекор, неискосени тревници, распадната урбана опрема и преполни контејнери и корпи за отпад. Дополнително на тоа е енормното загадување на воздухот во зимскиот период, а сега е загрозен и водниот тек на реката Вардар и целиот негов екосистем
Застрашувачки се информациите за масовно уништување на животната средина на територија на Општина Аеродром откриен од инспекцијата на Град Скопје, велат денеска од Социјалдемократскиот сојуз (СДСМ).
Ваквата реакција на опозицијата следува откако градоначалничката на Град Скопје, Данела Арсовска, минатата недела објави видео во кое обвини дека приватна фирма без лиценца и одобрение за работа врши нелегален ископ на песок и бесправна експлоатација на коритото на реката Вардар во Општина Аеродром.
СДСМ смета дека општинската инспекција повеќе работи на личниот пи-ар и дигитален маркетинг на в.д. градоначалникот на Општина Аеродром, Дејан Митески, отколку на заштитата на животната средина.
„Додека општинските инспектори за заштита на животната средина спијат, градоначалничката од ВМРО-ДПМНЕ Данела Арсовска како во некое нискобуиџетно реално шоу објавува снимки од нелегална сепарација за ископ на песок кај мостот на Вардар во Долно Лисиче“,
се вели во партиското соопштение.
Според опозицијата, Општината Аеродром е во целосен распад, диви депонии има на секој чекор, неискосени тревници, распадната урбана опрема и преполни контејнери и корпи за отпад. Дополнително на тоа е енормното загадување на воздухот во зимскиот период, а сега е загрозен и водниот тек на реката Вардар и целиот негов екосистем.
„Дејан Митески на сограѓаните од Аеродром им должи одговори дали работи нешто општинскиот инспектор за заштита на животната средина? Дали Општина Аеродром има било каква информација или пријава дека на својата територија има сепарација за ископ на песок која работи без потребните лиценци, елаборати и дозволи? Доколку има дали тоа е проследено до Државниот инспекторат и инспекцијата на Град Скопје и зошто за тоа навремено не е информирана јавноста? Кога последен пат општинскиот инспектор за животна средина го посетил Долно Лисиче?“,
прашуваат од СДСМ.
Дополнително прашуваат и дали во последните четири години општинскиот инспектор за заштита на животната средина има констатирано било какви прекршувања на законите за животна средина на територија на Аеродром?
„Зошто раководителката на општинската администрација во работно време поминува повеќе време на расправање со граѓаните на Фејсбук отколку на терен?“,
се вели во партиската реакција.
Од СДСМ прашуваат и дали ова е дел од скандинавското управување со општините за кое говореше Мицкоски.
Градоначалничката на Град Скопје, Данела Арсовска, минатата недела се вклучи со видео во живо на својот фејсбук-профил од локација од Општина Аеродром, поточно кај мостот во Долно Лисиче, спроти Опитно Поле.
Обзнани дека приватна фирма без лиценца и одобрение за работа врши нелегален ископ на песок и бесправна експлоатација на коритото на реката Вардар во Општина Аеродром.
На терен, како што посочи, се затекнати нелегални активности на бесправна експлоатација на коритото на реката Вардар, од фирма која нема никакви лиценци, елаборати, дозволи и одобренија ниту за работа ниту за механизацијата, со која, како што додаде, ги извршуваат овие злодела против природата, а што потенцијално претставува и опасност по здравјето на граѓаните.
Претходно, таа објави видео од Општина Чаир, од каде покажа две градилишта, на кои рече дека се гради на диво.