Да застанеме во тишина за нашите 63 ангели – собир во 02:15 часот пред „Пулс“ во Кочани

„Ќе оддадеме почит со една минута молк. Во 02:32 часот, моментот што засекогаш го промени Кочани. Нека светлината сведочи дека не забораваме. Нека тишината зборува за љубовта што останува“, се вели во соопштението од Здружението „16 март 2025“ на Фејсбук

Рано утрово во 02:15 часот пред поранешната т.н. дискотека „Пулс“ во Кочани ќе се одржи собир на кој ќе им се оддаде сеќавање и почит на жртвите од минатогодишната трагедија.

Овој собир, според Здружението „16 март 2025 година“, ќе означи една година од трагедијата во т.н. дискотека „Пулс“ во Кочани во која животот го загубија 63 лица, а повеќе од 200 беа повредени.

„Да застанеме заедно во тишина со нашите 63 ангели. Ќе оддадеме почит со една минута молк. Во 02:32 часот, моментот што засекогаш го промени Кочани. Нека светлината сведочи дека не забораваме. Нека тишината зборува за љубовта што останува“,

се вели во објавата од Здружението на Фејсбук.

Викендов со различни настани се одбележува годишнината од трагедијата.

Велосипедска тура и кошаркарски натпревар во чест на жртвите и поддршка за повредените во „Пулс“

Пред „Пулс“ денеска се поставени 63 срца со имињата на загинатите, како потсетник на младите животи што згаснаа таа ноќ.

(ВИДЕО)„Од пламен до надеж“ – емотивни сведоштва на дел од преживеаните во пожарот во „Пулс“

Во Скопје, во организација на Владата изминатите два дена се одржа меѓународната конференција „Институционални и клинички аспекти и решенија по пожарот во Кочани“.