Прашан за тврдењата на градиначалничката Арсовска дека инцидентот се случил пред полициски службеници кои не интервенирале, министерот за внатрешни работи во интервју за ТВ Сител рече дека фактичката состојба ќе биде утврдена и оти никој не смее да се чувствува небезбеден во државата, но исто така, додаде, не смее да се дозволи македонската јавност некој грубо да ја манипулира
Лицето што скопската градоначалничка Данела Арсовска го посочила дека денеска ја нападнало во Чаир, како и уште две лица кои вербално ја навредувале се приведени во полициска станица, а за случајот е известен и јавен обвинител по чии насоки се постапува.
Ова вечерва го соопшти министерот за внатрешни работи Панче Тошковски во интервју во централниот Дневник на ТВ Сител, во врска со инцидентот со градоначалничката на Скопје која, според нејзините тврдења, денеска била физички и вербално нападната во скопски Чаир додека заедно со нејзини соработници вршеле увид на дивоградба.
Сепак говорејќи за конкретниот настан и повикувајќи се на информации шшто ги добил, Тошковски рече дека треба да се почека да се утврдат сите факти, бидејќи, како што имплицираше „да не излезе дека тој што се претставува како жртва е токму оној кој предизвикал физички напад“.
Ниту еднаш не ословувајќи ја по име и презиме, туку со „госпоѓата“ или „г-ѓата градоначалничка“, Тошковски наведе дека Арсовска по настанот не дошла веднаш во полициска станица, а откако се појавила не сакала да го потпише записникот од пријавата.
Во меѓувреме, како што кажа министерот, таа била во болница, каде од страна на лекар и била констатиран лесна телесна повреда, односно црвенило на левата потколеница.
„Да зборуваме со факти. Факт број еден, полиција кога е повикана да дојде на местото на настанот, дошла. Факт број два, г-ѓата по настанување на оној инцидент била повикана да дојде во полициска станица, не дошла. Таа цело време објавува на социјалните мрежи, портали итн. Во болница и биле констатирани црвенила, телесни повреди, од страна на стручно лице доктор, барем така сум информиран од страна на службите на левата потколеница. Откако завршил прегледот во болница г-ѓата се упатила повторно во полициска станица. Била примена од полициските службеници, отпочнале со полициски дејствија, во меѓувреме контактирале јавен обвинител. Лицето што го навела како такво е приведено, е во полициска станица, како и уште две лица коишто вербално се заканувале. При составување на записникот и примање на пријавата од страна на г-ѓата истата станала и си отишла. Не потпишала записник. Повторно само на Фејсбук парадираме, а притоа г-ѓата не потпишала записник. Па сега се поставува прашање, да не случајно жртвата која се прикажува во јавност е токму оној кој предизвикал физички напад. Да не испадне на крајот такво нешто“,
рече Тошковски во интервјуто.
Тој изрази длабоко жалење без оглед, како што кажа, кој е нападнат во ситуацијата, додавајќи дека особено осудува напад на жена и особено доколку таа г-ѓа е избрана на избори за градионачалник. Но, надоврзувајќи се кажа да не излезе случајно дека сето ова е едно добро смислено сценарио за политички циркус каде за нему непознат интерес жртвата ќе биде токму оној којшто сторил физички напад.
„Да не излезе така? Бидејќи добивам такви информации, претпоставувам не знам“,
рече тој.
Во меѓувреме дел од порталите објавија снимка, од која наводно се гледа дека Арсовска била таа која прва извршила физички напад. Снимката наводно е од надзорна камера и на неа се гледа како жена со клоца удира машко лице во нога. Лицата стојат под чадор и не им се гледаат лицата.
„Снимка со свои очи досега немам видено заради тоа што имав работни обврски во текот на денот и нема можност да видам одредени докази кои се клучни за фактичката состојба“,
кажа во врска со ова Тошковски.
Прашан за тврдењата на градиначалничката Арсовска дека инцидентот се случил пред полициски службеници кои не интервенирале, министерот за внатрешни работи рече дека фактичката состојба ќе биде утврдена и оти никој не смее да чувствува небезбеден во државата, но исто така, додаде, не смее да се дозволи македонската јавност некој грубо да ја манипулира.
„Да не излезе дека некој грубо ја манипулира македонската јавноста и ќе видиме од кои причини. Доколку се утврди дека полициски службеници гледале и не презеле дејствија ве уверувам дека ќе бидат спроведени во најбрза постапка, така како што доликува, ама да не се утврди нешто друго. Јас немам видено со свои очи ништо, но ме убедуваат дека фактичката состојба била многу поинаква од тоа што е презентирано досега во јавноста“,
кажа министерот за внатрешни работи.
Инаку, Тошковски на истата тема претходно говореше и во интервју за ТВ Телма каде рече дека во случајот имало физички контакт, но оти е лага дека било пред очите на полицијата.
Во разговорот за ТВ Сител, како и во оној за Телма, прашан зошто на Арсовска не и било дадено обезбедување бидејќи веќе подолг период тврди дека и се закануваат по живот, Тошковски ги отфрли наводите дека полицијата не постапува и наведе дека градоначалничката не доаѓала во полициска станица да ги пријави таквите закани.
Тој наведе два случаи од почетокот на јуни и од овој месец кога по пријава дека полициски службеник и се заканувал на Фејсбук, екипи на Одделот за внатрешна контрола, псоред Тошковски морале да одат во Град Скопје за да направат записник за заканите.
„Одделот за внатрешна контрола поведува дисциплинска постапка против полицискиот службеник и ја известува г-ѓата градоначалничка дека таква состојба е поведена. Зошто градоначалничката ова не го обзнани на јавноста и не кажа дека Министерството за внатрешни работи во целост постапило со молење, односно ја молело да даде изјава и покрај тоа што таа е должна да пријави доколку има закани по нејзиниот живот“,
рече Тошковски.
Идентично, како што кажа министерот, било и со пријавите за закани кон советничката во Град Скопје, Ирена Витина.
„Повторно не е точно дека Министерството за внатрешни работи не презема дејствија и не постапува. Ова се докази, ова не се празни муабети како што ги слушаме во изминатиот период. Јас ја разбирам потребата за циркус, јас разбирам дека некој се разбудил од зимски сон по три и кусур години од мандатот и сега решил да си ја врши работата. Добро е МВР да си ја работи својата работа, а градоначалничката нејзината работа“,
рече Тошковски.