„Дали Македонците беа најсреќни со потпишување на Рамковниот договор? Убеден сум дека не е така. Чувство на огорченост, гнев. Веројатно такво било чувството и кај Албанците. Системски и тешки реформи, менување на Уставот во услови на воен конфликт. Но, да зборуваме отворено, Рамковниот договор 24 години потоа донесе мир“, рече премиерот во говорот на свечената владина седница
Овој ден не е само спомен. Овој ден е обврска – да се потсетиме на храброста на оние што тогаш застанаа и рекоа: „Доста е со поделби, време е за мир“, обврска да не дозволиме омразата и нетрпеливоста повторно да пуштат корен, обврска да им оставиме на нашите деца држава која е обединета, силна и праведна.
Ова беше дел од говорот на премиерот Христијан Мицкоски на денешната свечена владина седница по повод одбележување на 24-годишнината од потпишувањето на Охридскиот рамковен договор.
Премиерот порача дека во државата постои заедничка иднина за сите, иднина која ќе биде онаква каква што ќе се создаде денес. Упати повик до сите без разлика на вера, националност или политичка (не)определба да ја изберат државата пред поделбата, иднината пред минатото, љубовта кон татковината пред омразата.
„Рамковниот договор не е само лист хартија. Тој е симбол на зрелост, храброст и мудрост. Потсетник дека, колку и да се разликуваме по јазик, вера, култура или етничка припадност – сите делиме една историја и една заедничка иднина. Тој е доказ дека Македонија може да биде дом за сите свои граѓани, и дека различностите се наша предност. Да им покажеме на сите – дома и надвор – дека остануваме верни на патот на мирот и заедништвото, дека сме научиле од минатото, дека сме подготвени да се гледаме во очи и да кажеме ‘Заедно сме посилни’“,
рече Мицкоски во својот говор.
Во своето обраќање на свечената владина седница премиерот се наврати на воениот конфликт во летото 2001 година, за кој рече дека е еден од најтешките во поновата историја.
„За овие работи треба да се зборува отворено и без ракавици. Дали Македонците беа најсреќни со потпишување на Рамковниот договор? Убеден сум дека не е така. Чувство на огорченост, гнев. Веројатно такво било чувството и кај Албанците. Системски и тешки реформи, менување на Уставот во услови на воен конфликт. Но, да зборуваме отворено, Рамковниот договор 24 години потоа донесе мир, стабилност и зачувана унитарност на Македонија“,
изјави Мицкоски.
Во оваа смисла премерот обвини дека Рамковниот договор долго време бил злоупотребуван од поединци кои го користеле национализмот за заштита на криминалот и личните интереси, а последица на тоа, како што рече, е тоа што луѓето ја напуштаат државата. Куферите кои си заминуваат, додаде Мицкоски, немаат националност.
„Тоа е најдобрата порака на народот спрема оние кои 20 години манипулираат дека работат за нив, а постојано ги делат. Натпреварот не е кој колку може да биде радикален или да се удира во гради со простодушен национализам. Битката е да ги решиме реалните проблеми, да обезбедиме подобри услови за живот, за работа, просперитет за секој Македонец, Албанец, Турчин, Ром, Србин, Влав, Бошњак и другите наши сограѓани. Нашата задача е да обезбедиме иднина за сите, затоа што Македонија е дом на сите нејзини луѓе“,
додаде премиерот.
Рече дека со носењето на Законот за правична застапеност е исполнета последната обврска и дека за Рамковниот договор повеќе нема отворени прашања. Додаде дека 24 години по потпишувањето е јасно дека мирот не е нешто што се подразбира туку дека се гради секој ден, бара почит и подготвеност да се слушне и другата страна.
„Денес не живееме во 2001 г. Но, исто како и тогаш, сме пред избори – не избори на хартија, туку избори во срцето и умот. Ќе дозволиме ли повторно да се појават ѕидови меѓу нас? Ќе се препуштиме ли на поделби и недоверба? Или ќе го избереме патот кој тогаш го избравме – патот на заедништво, на почитување, на љубов кон татковината и меѓусебно разбирање?“,
рече премиерот Мицкоски.