Како што информираат од Владата на средбата меѓу премиерот и лидерот на опозициската СДСМ се зборувало и за тоа дека е неоходно да се мобилизираат сите напредни поединци и структури кои можат да дадат придонес на патот за развој на земјата
Премиерот Христијан Мицкоски и лидерот на Социјалдемократскиот сојуз (СДСМ), Венко Филипче на денешната средба се договорија да формираат работни групи кои ќе разговараат за реформските законски решенија, кои, пак треба да ги гарантираат заложбите за напредок, информираат попладнево од Владата.
„На средбата беше истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит за сите граѓани. Во тој контекст, беше истакнато дека е неоходно да се мобилизираат сите напредни поединци и структури кои можат да дадат придонес на патот за развој на земјата“,
се вели во соопштението од Владата.
На средбата, како што пишува во владиното соопштение, премиерот посочи и дека македонските државни интереси треба да бидат појдовната точка во разговорите за секое прашање, при што побара од Филипче да се потруди да биде конструктивен фактор во определбата за промени, реформи и напредок.
„Државата мора да биде во служба на граѓаните и да се случат коренити реформи на системот од кој граѓаните се незадоволни“,
рече Мицкоски на средбата со Филипче.
По средбата, Филипче рече дека и до премиерот е стигната пораката оти е потребна заедничка работа во области што се важни за подобрување на квалитетот на живеењето.
„Начелно договоривме дека ќе работиме на начинот да формираме заеднички тела или работни групи во делот пред сè на спроведување на реформската агенда. Значи првичните закони коишто треба да стигнат во Собранието во делот на правосудството, нешто што ги тангира сите, понатаму енергетиката и некои работи во однос на стратешките движења и проекти во здравството“,
рече тој.
Прашан дали веќе договориле следна средба, Филипче одговори негативно додавајќи дека ова било меѓупартиска средба, а најави дека ќе бидат поканети и сите партии да се вклучат.
Неговите очекувања се дека по ова сите политички партии ќе седнат на масата.