Потписниците на Рамковниот договор, Георгиевски и Црвенковски, не се појавија на денешната конференција, каде што актуелниот премир и лидер на СДСМ оцени дека една од најважните придобивки е што сега низ дијалог си го организираме животот, посветени на секоја индивидува, семејство и граѓанин
Да беше Зоран Заев во 2001 година немаше да се случи тоа што се случи, искоментирал лидерот на ДУИ, Али Ахмети, на денешната конференција во Скопје по повод 20-годишнината од Рамковниот договор, како што им пренесе на присутните организаторот на настанот – првиот вицепремер Артан Груби.
Груби, најавувајќи го Заев како говорник, забележа дека тој имаше храброст да го потпише Преспанскиот договор во 2018 година и дополни – да беше во позиција во 2001 година сигурно ќе го потпишеше и Охридскиот договор. Кога Заев заврши со говорот, Груби се наврати на забелешката од почетокот, нагласувајќи:
„Кога реков – да беше Заев во 2001 година сигурно ќе го потпишеше Рамковниот договор, Ахмети ми дошепна – да беше Заев немаше да се случи тоа што се случи во 2001 година“.
На договорот од Охрид, кој беше постигнат по неколкумесечни преговори, стои потписот на тогашниот лидер на СДСМ, Бранко Црвенковски, инаку претходник на Заев на челната позиција во СДСМ. Црвенковски учествуваше во мировниот дијалог како предводник на најголемата опозициска партија од „македонскиот политички блок“ во тоа време, додека „наспроти него“ беше тогашниот премиер и лидер на ВМРО-ДПМНЕ, Љупчо Георгиевски.
Црвенковски и Георгиевски не се појавија на денешната конференција „По Охрид“, која, всушност, е централниот настан од одбележувањето на 20- годишнината од Рамковиниот договор. Од домашните актерите во бурните политички случувања во тоа време, кога државата се соочуваше со воен конфликт, досега се обратија: Претседателот Стево Пендаровски, кој во кризната 2001 година беше советник во кабинетот на тогашниот претседател Борис Трајковски, кој, пак, беше покровител на мировните преговори и лидерот на ДУИ, Али Ахмети, кој во тоа време ја предводеше ОНА, за во 2002 година да ја формира партијата која и сега е на власт во земјава и повторно е коалициски партнер на СДСМ.
Заев, пак, кој влезе во повисоките нивоа на политиката по парламентарните избори во 2002 година, на кои беше кандидат на пропорционалната листа на СДСМ, денеска, од позиција на премиер и лидер на главната владејачка партија, се обрати по повод дводеценискиот јубилеј од Рамковниот договор. После Охрид, нагласи Заев, нашата земја гради зрели политики, и, наместо конфликти, разговараме за економски напредок во нашата земја и унапредување на добрососедските односи, а заедно со нашите соседи создаваме „Отворен Балкан“.
„По Охрид, сите заедно, без разлика на нашата етничка, национална, верска, социјална и културна припадност изградивме едно еднакво општество, каде што секој може да најде просперитет и подобра иднина. Драго ми е, што после 20 години дискутираме за сите овие придобивки. Една од наважните придобивки е што низ дијалог си го организираме животот, заедно посветени на секоја индивидува, семејство и граѓанин“,
изјави Заев.
Во 2017 година, нагласи Заев, наш приоритет беше да му дадеме живот на договорот и се донесе законот за употребата на јазиците, со што се заокружија одредбите од Охридскиот рамковен договор.
„Охридскиот договор стави крај на конфликтот, кој за жал однесе и жртви, но од оваа дистанца можеме слободно да кажеме дека е гаранција на мирот, кој подоцна го надградивме и унапредивме, создавајќи заеднициа во која граѓаните имаат соживот и меѓусебно почитување и толеранција. Заедница во која граѓаните имаат исти или слични визии за подобро утре. Северна Македонија е прекрасен мозаик од етнички и други заедници и различности“,
истакна тој.
Охридскиот рамковен договор, нагласи Заев, ја испрати и пораката за меѓусебно разбирање, извинување и простување меѓу Македонците и Албанците и меѓу сите други сограѓани.
„Тоа е пораката за соживот, за еднакви граѓани во заедничката татковина. Како држава ги презедовме сите неопхподни мерки за градење интегрирано опшество, кое е цврсто базирано на владеење на правото, заштита на човековите права, почитување на различностите и се развиваме во заедница во која шансите се еднакви за сите, како членка на НАТО и идна членка на ЕУ“,
рече Заев.