Даниловски посочи дека врвот од третиот бран се очекува кон средината на април и посочи дека неопходни се поголеми рестрикции, како викенд-карантини со цел да се намали трансмисија на вирусот и притисокот во болниците
Употребата на антибиотици за лекување на ковид-пациенти без да постојат докази за постоење на бактериска инфекција е една од причините за големата стапка на смрност, вели емидемиологот Драган Даниловски во изјава за Канал 5.
Тој посочува дека на овој начин слабее имунитетот на организмот и големи се шансите за да се развие тешка клиничка слика и да дојде до смртен исход.
„Нашиот народ генерално на овие простори во просек има многу полоша здравствена состојба споредено со било која друга европска земја. Поразителна вистина. Народот нездраво живее. Речиси половина се пушачи, нездраво се хранат, наместо да спортуваат на чист воздух се дреме по кафеани и кладилници, секој трет е со висок крвен притисок. Тоа е едниот фактор и практично на таква подлога кога ќе се фати вирус, може да претпоставите дека тој има лесна работа да го совлада домаќинот. Друг многу важен фактор е недозволиво често ординирање антибиотици кај ковид пациенти, без бактериска компликација. Без да има доказ за бактерија се даваат антибиотици и тоа не еден, туку два, дупли дози, па и три. Секој ден се соочувам со такви пораки од граѓани кои ми велат дали да го пијам и панцефот, и сусамедот и трицефот, а на крај и мендацин инфузија. Катастрофа. Заради тоа се случува антибиотикот да ја уништи бактериската цревна флора, која е регулатор на имунитетот на организмот, а без регулација одбраната на организмот е на коленици, нема адекватна одбрана. Заради тоа настануваат тешки симптоми и шансата да се умре е многу повисока. Ете затоа толку ни умираат. Тоа е стручна грешка и навистина еден ден треба некој да одговара и да им се земат лиценци за работа“,
вели Даниловски.
Тој посочи дека врвот од третиот бран од ковид-19 се очекува кон средината на април и рече дека неопходни се поголеми рестрикции, како викенд-карантини со цел да се намали трансмисија на вирусот и притисокот во болниците.
„Со висока веројатност врвот може да го очекуваме кон втората половина на април, кон средината. Тоа нема да значи крај на нашите маки, заради тоа што ако е достигнат пик ние сме понимале некое време качувајќи се до тој врв и отприлика слично време ќе треба да се симнеме од таму, некои пет-шест недели…Полицискиот час не може да нема влијание на одредено намалување на бројките, затоа што го редуцира бројот на контакти колку-толку. Но, и натаму бројките се високи. Верувам дека нема криза за слободни кревети, но што правиме со здравствените работници? Се мисли ли на нивната физичка и психичка издржливост. И на крајот на краиштата, може ли да се очекува квалитетна нега на некоја на пример, од хирушките клиники. Затоа се залагам за краткотраен локдаун, затворање за време на викенд за да може да се забави стихијата, да се здивне. Тоа ќе овозможи намалување на дневните бројки, и на заболени и на починати. 50 мртви дневно навистина е премногу“,
вели Даниловски.