„Именувањето на човек кој целата своја јавна и политичка кариера ја изгради со навреди и омаловажување кон Албанците, претставува директна провокација не само за Албанците во Северна Македонија, туку и за самата европска идеја во земјава“, реагираат од ДУИ
Демократската унија за интеграција го осуди именувањето на Петар Богојевски за раководител на Националната агенција за европски образовни програми и мобилност. Според ДУИ, оваа институција има за цел да ги приближува младите кон европските вредности, „а не да ги навредува и понижува“.
„Именувањето на човек кој целата своја јавна и политичка кариера ја изгради со навреди и омаловажување кон Албанците, претставува директна провокација не само за Албанците во Северна Македонија, туку и за самата европска идеја во земјава. Посебно иронично и трагично е тоа што истиот овој поединец беше предмет на кривична пријава токму од партиите на ВЛЕН во Владата, а денес, со нивна поддршка, е награден со водечка функција“,
реагираат од ДУИ.
Дополнително, додаваат интегративците, доверувањето на управувањето со европски фондови на човек кој не само што упатувал навредливи пораки до Албанците, туку и до самата Европска Унија и нејзините вредности, претставува понижување и за европските партнери и за даночните обврзници на ЕУ кои ги финансираат овие програми.
„ДУИ повикува на итно повлекување на оваа срамна одлука и враќање на сериозноста во процесите што се однесуваат на европската интеграција, образованието и соживотот. Владата не смее да си дозволи да ја претвори државата во сцена за евтини провокации, на штета на соживотот и европската перспектива“,
порачаа од ДУИ.
Петар Богојевски, лидерот на партијата Македонски концепт, коалициски партнер во власта, вчера беше назначен за нов директор на Националната агенција за европски образовни програми и мобилност.
Богојески на оваа функција доаѓа на местото на Марко Ѓоргиевски, кој како в.д. директор ја водеше оваа институција од 2020 година.
Најголем дел од парите со кои располага агенцијата доаѓаат од програмата на Европската Унија „Еразмус+“ наменета за поддршка во образованието, обуката, младите и спортот во државите во Европа, вклучително и земјава.