Не може со една алатка да се решаваат проблемите во целиот јавен сектор, потенцира вицепремиерот во ТВ-дебата со синдикални претставници, кои, пак, го повикаа да дојде во среда на протестот и да се обрати пред присутните
Само сакам да се држиме до тоа што сме го договориле, порача вечерва вицепремиерот за економски прашања Фатмир Битиќи во дебата на ТВ 24 со синдикални претставници за скалестото зголемување на платите во јавниот сектор.
Битиќи изрази жалење што за само три недели, откако почна руско-украинскиот конфликт, не важи она околу кое сите страни се согласиле на 23 февруари и веќе се најавуваат штрајкови. Според него, тоа е непочитување на основните принципи на дијалог.
Не може, потенцира вицепремиерот, со една алатка да се решаваат проблемите во целиот јавен сектор.
„За жал, забораваме дека на 23 февруари, кога дојдовме до договор, немаше војна, а пред три недели тоа се случи. Имаме војна, драстично зголемена енергетска криза и драстичен удар на економската страна заради зголемување на цените во прехранбениот сектор, запирање на вредносните ланци во скоро сите сектори и тоа бара прилагодување. За три недели, покрај се што се договоривме, одеднаш не доведе во ситуација да се соочиме со најави за штрајкување и за нас тоа е навистина зачудувачки, зашто само пред 1,5 месец се договоривме дека влегуваме во процесот. Донесовме и одлука дека дијалогот продолжува, но, за жал, беше најавено дека на 30 ќе има протест, а се договоривме дека дијалогот ќе продолжи во секое министерство и никој не рече дека не сака да преговара“,
истакна Битиќи.
Како што објасни Битиќи, ако била заедничка констатацијата дека членот 8-а дава шест месеци период на усогласување, тогаш минималната плата по новиот Закон се уште не е исплатена.
„Треба пред јавноста да кажеме дека никогаш досега во историјата на државата не се случило да усогласат за еден ден плати во цел јавен сектор дури и кога јавниот сектор бил за 50 отсто помал од овој што е во овој момент“,
потенцира Битиќи.
Во врска со минималната плата, тој рече дека сегашното решение можеби не е достинствено, но сепак засега е максимум што може да се направи.
Синдикалните претставници, кои побараа унапредување на социјалниот дијалог, го повикаа да дојде во среда на протестот и да се обрати пред присутните. Трпението, напоменаа, им е при крај, а „со пет проценти покачување на платата не се живее“.
Претседателот на ССМ, Дарко Димовски, во вечерашната емисија „24 анализа“ истакна дека минималната плата од 18 000 денари е голем успех и легитимно право е што бараат скалесто зголемување на сите останати плати, согласно порастот на минималната плата.
„Тоа го нуди членот 8 од Законот за минимална плата. Преговараме со ресорните министерства, кој од каде припаѓа, и со повеќе од 15 комунални претпријатија потпишавме за скалестото зголемување на платите кое ќе важи од 1 април“,
рече Димовски.
Тој појасни дека согласно законот, штом порасне минималната плата, во рок од шест месеци, работниците треба да преговараат со работодавците, без да разлика дали се институција, министерство или претпријатие, за скалесто зголемување на другите плати и рече дека е задоволен како течат преговорите со град Скопје, со општините и со хотелите.
Јаким Неделков од СОНК рече дека имаше незадоволство по потпишувањето за минималната плата, зошто се однесувало на одредени вработени.
Трпе Деаноски од УПОЗ рече дека на последната седница на Економскиот социјален совет се договориле да се продолжи со разговорите за усогласување на сите останати плати со порастот на минималната плата.
Благоја Ралповски од Конфедерација на слободни синдикати рече е дојдено до ситуација кога разликата меѓу оние со средно и високо образование се намалува од 6 000 на 3 000 денари.
„Проблемот има наједноставно решение. Значи не треба да менуваме ниту 20 закони, ниту колективни договори и член 88 од Законот за административни службеници, со кој се уредуваат платите и на јавните и на комуналните и на оние чија сопственост е Владата, вика дека Владата го носи бодот. Проблемот ќе се реши ако Владата го смени бодот“,
смета Ралповски.