Први на листата на програмски определби на коалицијата на Алтернатива, Беса и Демократско движење се полноправното членство на Северна Македонија во Европската Унија, продлабочување на партнерството со САД, како и бескомпромисна уставна и правна битка против криминалот, корупцијата и злоупотребата на правдата во државата
Претседателите на албанските партии од опозицискиот блок – Африм Гаши од Алтернатива, Билал Касами од Беса и Изет Меџити од Демократско движење, синоќа на свечен настан во Тетово потпишаа декларација на коалицијата „Европски сојуз на промени“ со која се обврзаа на заеднички настап на претстојните избори в година.
Во текстот на декларацијата, која денеска беше испратена до медиумите, се наведени главните столбови на кои ќе биде посветена обединетата албанска опозиција во рамки на коалицијата.
Први на листата на програмски определби се полноправното членство на Северна Македонија во Европската Унија, продлабочување на партнерството со САД, како и бескомпромисна уставна и правна битка против криминалот, корупцијата и злоупотребата на правдата во државата.
„Целосна еднаквост меѓу двата државотворни народи (Македонците и Албанците), оставајќи ги настрана сите досегашни уставни и законски дефиниции изразени во термини и бројки кои денес служат за утврдување на правата на албанската нација“,
се наведува понатаму во декларацијата.
Во декларацијата потпишана од Гаши, Касами и Меџити, понатаму се наведува заложбата за радикални реформи во подобрување на животниот стандард на граѓаните, ревизија на системот на платите во јавниот сектор и поддршката на приватниот сектор како и правичен регионален развој. Еден од програмските столбови на коалицијата, како што се посочува, е и подготовка на стратегија за развој на образованието.
„Изготвување на националната стратегија за враќање на работоспособните иселеници, која ќе ја изгласа Собранието на Република Северна Македонија и неотуѓиво инсталирање на меритократијата во правото на работа и напредување во кариерата“,
е една од точките во фокус на коалицијата „Европски сојуз на промени“.
На крајот се посочува дека коалицијата останува отворена за сите поединци, здруженија и политички партии кои покажуваат волја да ѝ се приклучат, за како што се вели, да ги потврдат овие програмски определби.