Според договореното, од средствата во висина од пет отсто од БДП, најмалку 3,5 отсто годишно ќе бидат наменети за расходи за одбрана на НАТО, за потребите за основни одбранбени ресурси и за исполнување на Целите за способностите на Алијансата. Останатите 1,5 отсто од БДП годишно ќе бидат наменети за заштита на критичната инфраструктура, обезбедување на граѓанска подготвеност и отпорност, иновации и за зајакнување на одбранбената индустриска база
Сите 32 членки на НАТО на денешниот Самит во Хаг се согласија на историски чекор и се обврзаа да ги зголемат трошоците за одбрана и безбедност на пет отсто од бруто-домашниот производ (БДП) до 2035 година.
Одлуката е потврдена во завршната декларација од Самитот во Хаг и е усвоена од сите 32 земји членки на НАТО.
„Обединети пред сериозните безбедносни закани и предизвици, особено долгорочната закана што ја претставува Русија за евроатлантската безбедност и постојаната закана од тероризмот, сојузните се обврзуваат да инвестираат пет отсто од БДП годишно за основни одбранбени потреби, како и за трошоци поврзани со одбраната и безбедноста до 2035 година за да ги обезбедат обврските во согласно со член 3 од Вашингтонскиот договор“,
се вели во Декларацијата усвоена на денешниот Самит на НАТО во Хаг.
Во документот се предвидува и дека земјите членки ќе поднесуваат годишни планови за исполнување на целта, со кредибилен и прогресивен пат кон постигнување на договореното ниво на инвестиции. Преглед на напредокот е најавен за 2029 година.
Во исто време, новата обврска претставува засилување на постојниот праг од два отсто од БДП, што досега важеше како препорачан минимум за одбранбени трошоци.
Според договореното, од средствата во висина од пет отсто од БДП, најмалку 3,5 отсто годишно ќе бидат наменети за расходи за одбрана на НАТО, за потребите за основни одбранбени ресурси и за исполнување на целите за способностите на Алијансата.
Преостанатите 1,5 отсто од БДП годишно ќе бидат наменети за заштита на критичната инфраструктура, обезбедување на граѓанска подготвеност и отпорност, иновации и за зајакнување на одбранбената индустриска база.
Сојузниците ги потврдуваат и своите обврски за поддршка на Украина, чија безбедност придонесува за безбедноста на НАТО и за таа цел се реафирмира посветеноста на директен придонес кон одбраната на Украина и нејзината одбранбена индустрија при пресметувањето на трошоците за одбрана на сојузниците.
Во декларацијата е потврдена посветеноста кон членот 5 од Вашингтонскиот договор, според кој напад врз една членка се смета за напад врз сите.
Следниот Самит на НАТО е закажан за 2026 година во Турција, по што ќе следува состанок во Албанија.