Четворица пациенти повредени во пожарот во Кочани се враќаат од Софија и Белград

По враќањето на овие пациенти, во странските медицински центри ќе останат на лекување уште 11 пациенти од повредените во пожарот во Кочани

Четворица пациенти повредени во пожарот во Кочани се враќаат во земјава, информираат денеска од Министерството за здравство. Еден од пациентите што беше на лекување во Софија е вратен вчера, а денеска се очекува од Белград да бидат вратени две лица. Четвртиот пациент, кој исто така бил на лекување во Софија треба да пристигне утре.

Пациентите, како што велат од министерството, ќе бидат задржани под опсервација на Клиниката за пластична хирургија и Клиниката за хируршки болести „Свети Наум Охридски“.

По враќањето на овие пациенти, во странските медицински центри ќе останат на лекување уште 11 пациенти од повредените во пожарот во Кочани.

„Пациентите што се лекуваат во странство се во стабилна состојба“,

велат од Министерството за здравство. 

Муцунски ја посети болницата во Стокхолм каде што беа сместени четворица повредени во пожарот во Кочани

Како што додаваат, специјалисти од Клиниката за пластична хирургија повеќепати во неделата редовно одат во Општата болница во Кочани и вршат преглед, преврски и тријажа на повредените пациенти, а воедно и специјалисти по физикална медицина и специјалисти од психијатрија се вклучени во третманот на лицата со изгореници.

„Министерството за здравство континуирано ја следи состојбата со повредените пациенти, со цел обезбедување најдобар можен третман, како и натамошна рехабилитација“,

додаваат оттаму.

Во пожарот во т.н. кабаре „Пулс“ во Кочани, што избувна рано изутрина на 16 март, животот го загубија 62 лица, а близу 200 беа повредени и пренесени на лекување во болниците низ државава и медицинските центри во странство. 

За трагедијата која ја потресе целата држава истрага се води против 68 физички и три правни лица.