Меѓу осомничените е поранешниот заменик-министер за земјоделство, шумарство и водостопанство Трајан Димковски од редовите на СДСМ
Од СДСМ акцијата ја оценија како политички монтиран процес на власта за да го тргне вниманието од случајот со злоупотреба на средства од ИПАРД-фондовите, додека од ВМРО-ДПМНЕ одговорија со обвинувања дека социјалдемократите продолжуваат да ги штитат „криминалците во сопствените редови“.
Пет лица, од кои четворица поранешни функционери, се осомничени во денешната акција на Основното јавно обвинителство (ОЈО) Скопје и Министерството за внатрешни работи (МВР). Како што соопштија попладнево од Јавното обвинителство, против нив е отворена постапка поради основано сомневање дека како соизвршители сториле кривично злоупотреба на службената положба и овластување од член 353 став 5 во врска со став 4 и став 1 од Кривичниот законик (КЗ).
Кривичното дело за кое се товарат е поврзано со Агенцијата за стокови резерви, од каде што бил направен отпис на поголемо количество меркантилна пченица и јачмен, а државниот буџет оштетен за неколку стотици илјади евра.
Во врска со акцијата попладнево детали споделија и ОЈО Скопје и Министерството за внатрешни работи, со таа разлика што од МВР ги соопштија иницијалите на осомничените, кои, како што информираат оттаму, се лишени од слобода.
„На 25.11.2025 година, полициски службеници од Единицата за финансиски криминал при Секторот за криминалистички истраги во Одделот за сузбивање на организиран и сериозен криминал ги лишија од слобода Н. Р. (51) од Куманово, поранешен директор на Јавно претпријатие за берзанско работење ‘Агро берза’ Скопје, Р. А.(61) од Тетово, поранешен директор на Агенцијата за стоковни резерви Скопје, Т. К. (55) од Скопје, поранешен раководител во Агенција за стоковни резерви Скопје, Т. Д. (58) од Куманово, поранешен заменик-министер за земјоделство, шумарство и водостопанство и државен советник во периодот 2021-2022 година и М. П. (68) од Скопје, вешто лице“,
се вели во соопштението од МВР, од каде што додаваат дека против нив е поднесена кривична пријава за злоупотреба на службена положба и овластување по член 353 од КЗ.
Исто така, велат од МВР, извршени се претреси на пет локации во Скопје, Куманово и во Тетово.
За што се товарат осомничените?
Дел од медиумите објавија дека поранешниот заменик-министер за земјоделство, шумарство и водостопанство, Трајан Димковски, е меѓу осомничените. Тоа го потврдија и од Социјалдемократскиот сојуз на Македонија, чиј кадар во тогашната влада беше Димковски, а и иницијалите од соопштението на МВР одговараат со почетните букви од неговото име и презиме.
Според описот на делото за кое се товарат петтемина осомничени, тие ја злоупотребиле службената должност со тоа што не ја известиле Владата дека е настанат неоснован кусок на меркантилна пченица и јачмен од стоковите резерви, односно доставиле неточни податоци и информации, спротивно на Законот за стоковите резерви.
Имено, како што информираат од МВР, осомничениот М. П. како вешто лице кое било ангажирано како надворешен соработник изготвил вешт наод во кој внел невистинити податоци, не земајќи ги предвид сите податоци и целокупната документација од Агенција за стоковни резерви Скопје и Јавното претпријатие „Агро берза“.
„Вештиот наод бил приложен кон информацијата до Влада и истата била прифатена од нејзина страна, при што Агенцијата за стоковни резерви Скопје била задолжена да изврши отпис на 1 500 тони меркантилна пченица и 500 тони јачмен за сточна храна, во вкупна вредност од 29 112 000 денари или 473 365 евра (во моментот на отписот по цените кои се набавувала пченицата и јачменот во 2022 година, вредноста на истата изнесувала 48 000 000 денари или 780 487 евра), која вредност преставува штета на Буџетот на РСМ“,
се наведува во соопштенијата од Јавното обвинителство и од МВР.
Останатите четворица осомничени Обвинителството ги товари дека не ја извршиле својата службена положба, односно не ја известиле Владата дека во Јавно претпријатие за берзанско работење „Агро берза“ – Скопје е настанат неоснован кусок на меркантилна пченица и јачмен и доставиле неточни податоци и информации. Кусокот за кои тие поднеле податоци се однесувал на периодот од 2019 до 2021 година, иако занеле дека кусокот е за периодот од 2007 до 2019 година.
„Со ова дејствие лицата постапиле спротивно на Законот за стоковните резерви и изготвиле записник од 2022 година во кој дале заклучок за прифаќање отпис на кусок од складиштето „Агро берза“ Скопје, кој бил доставен со информација до Влада на РСМ заради усвојување на заклучокот од Владата, знаејќи дека кусокот се однесувал за период од 2007-2021 година. Истите знаеле дека нема законска основа да се земе предвид тој период од причина што во 2019 година била извршена целосна обнова на складираната меркантилна пченица и јачмен и во извршените контроли од Агенцијата до 2019 година, секоја година бил вршен надзор и не бил констатиран кусок, а секоја година им било доставувано решение“,
се вели во соопштението на МВР.
СДСМ и ВМРО-ДПМНЕ со меѓусебни обвинувања
Од СДСМ денеска преку писмена реакција акцијата ја оценија како политички монтиран процес на власта за да го тргне вниманието од случајот со злоупотреба на средства од ИПАРД-фондовите, за што во притвор заврши сега веќе поранешниот директор на Агенцијата за финансиска поддршка во земјоделството и руралниот развој, Илија Стоилев, кој на функцијата беше поставен како кадар на ВМРО-ДПМНЕ.
„Ваквите монтирани и неосновани пријави за Трајан Димковски, кој целосно ги разобличи сите злоупотреби на Министерството за земјоделство и неспособноста на оваа власт не може да бидат никакво алиби. Очекуваме судските органи да го следат исклучиво словото на законот и во целост да ги отфрлат овие неосновани и монтирани пријави за Димковски. Станува збор за класичен политички прогон, без правна основа и обид за замолчување на СДСМ во откривање на сите корупциски скандали на власта на Мицкоски“,
се вели во реакцијата од опозициската партија.
На реакцијата на СДСМ, пак, реагираа од ВМРО-ДПМНЕ, од каде ги обвинија социјалдемократите дека продолжуваат да ги штитат „криминалците во сопствените редови“.
„СДС да не ја замајува јавноста, време е СДС да ги тргнат рацете од институциите и да ги остават судските органи да работат исклучиво по тоа како што налага законот. СДС се нервозни поради тоа што се открива криминалот од нивното раководење на државата, на нивните функционери, кои ги уништија институциите и ја опустошија економијата. СДС треба да знае дека законот мора да се почитува. Политиката мора да ги тргне рацете од правосудниот систем“,
велат од ВМРО-ДПМНЕ, додавајќи дека судиите што ги избрале екслидерот на СДСМ и поранешен премиер, Зоран Заев, и лидерот на ДУИ, Али Ахмети, се виновни за ниската доверба во правосудството.
Бидејќи станува збор за дело кое се гони во скратена постапка, јавниот обвинител до судијата на претходна постапка доставил предлог на осомничените да им бидат одредени мерки на претпазливост. Имено, се бара од судот да им ги одземе пасошите на обвинетите и да им наложи да се јавуваат во суд.