Во селото Церово интервенираат тетовските пожарникари, додека пак во селото Мерово заедно со пожарникарите, на терен се и екипи на „Национални шуми“
Во текот на денешниот ден се евидентирани четири пожари во планинските предели на територија на Општина Желино – кај селото Мерово на Сува Гора и околу селото Церово на планината Жеден, информираат од Центарот за управување со кризи. Оттаму велат дека во моментот сите пожари се ставени под контрола, пред се, поради брзата и адекватна реакција на надлежните служби.
„Во Церово интервенираа екипите на тетовската Противпожарна единица, додека во Мерово заедно со пожарникарите делуваа и екипи од „Национални шуми“. Состојбата внимателно се следи. Загрижува што одредени поединци, со подметнување пожари, ја загрозуваат природата и животите на граѓаните“,
рече директорот на ЦУК, Мухамед Али.
Сомнежи дека овие пожари се подметнати има и градоначалникот на Општина Желино, Блерим Сејдиу кој на социјалните мрежи напиша оти пред неколкуу недели веднаш откако во функција бил ставен булеварот во Желино, пожар избувнал кај Групчин и Церово, а денеска пак, веднаш откако ги информирале граѓаните дека следуваат нови проекти за нив, истовремено се случија нови пожари на територијата на општината.
Како што соопшти Центарот за управување со кризи, во моментов има пет активни пожари и тоа во кај селото Церово, Општина Желино каде што гори ниска вегетација и мешана шума, во кај селото Оздолени, Општина Дебарца, во селото Добри дол во Општина Врапчиште, кај селото Могила во Општина Могила и кај езерото во Прилеп.