fbpx
Свет

Челниците на ЕУ го поздравија договорот за Газа

360степени | 9 октомври, 2025 10:54

Поздравувајќи ја одлучноста на Хамас и Израел да се согласат на договорот за првата фаза од мировниот план за Појасот Газа, европските лидери порачаа дека мирот е возможен и ги повикаа да се придржуваат до договорот за да се воспостави траен прекин на огнот

Претседателката на Европската комисија, Урсула фон дер Лајен, претседателката на Европскиот парламент, Роберта Мецола, и претседателот на Европскиот совет, Антонио Кошта, го поздравија договорот меѓу Израел и палестинската милитантната група Хамас за првата фаза од мировниот план за Појасот Газа.

Шефицата на Европската комисија, Фон дер Лајен, ги поздрави дипломатските напори на САД, Катар, Египет и Турција за постигнување на напредокот во договорот, посочувајќи дека сите инволвирани страни треба да го почитуваат со цел да се воспостави траен прекин на огнот.

„Европската Унија ќе продолжи да ја поддржува брзата и безбедна испорака на хуманитарна помош во Газа. И кога ќе дојде време, ќе бидеме подготвени да помогнеме во закрепнувањето и реконструкцијата. Денешната пригода треба да се искористи за да се изгради кредибилен политички пат кон траен мир и безбедност. Пат цврсто закотвен во решението за две држави“,

порача Фон дер Лајен во објава на Икс.

Претседателката на Европскиот парламент, Роберта Мецола, порача дека мирот е возможен и ги поздрави напорите на претседателот на САД, Доналд Трамп, и останатите посредници за постигнувањето на напредокот.

„Ова е клучен момент за мир и обнова на Блискиот Исток и отвора пат што конечно би можел да го прекине меѓугенерацискиот циклус на насилство, страдање и терор што го мачи регионот. Тоа им дава надеж на сите оние во Газа кои бараат мирна иднина и на семејствата на заложниците кои сè уште талкаат во тунелите на Хамас“,

пишува Мецола во објавата на Икс.

Претседателот на Европскиот совет, Антонио Кошта, истакна дека имплементацијата на почетната фаза од мировниот договор го отвора патот за долгоочекуваното ослободување на сите израелски заложници, прекин на огнот во Газа и крај на хуманитарната криза. Порача дека ова е клучна можност што мора да се искористи за да се постават темелите за траен мир, заснован на решение со две држави.

Договорот меѓу Израел и Хамас за првата фаза од мировниот план го поздрави и шефицата за надворешни работи на Европската Унија, Каја Калас, оценувајќи го за големо дипломатско достигнување.

Германскиот канцелар Фридрих Мерц порача дека првите чекори од договорот меѓу Израел и Хамас се охрабрувачки и нудат нова надеж за заложниците и нивните семејства, за луѓето во Газа и за целиот регион.

„Првпат по долго време постои реална перспектива за мир во регионот. Ги повикуваме сите страни да ги исполнат своите ветувања, да ја завршат војната и да го отворат патот за траен мир“,

порача Мерц додавајќи дека Германија ќе продолжи цврсто да го поддржува овој процес.

Претседателот на Франција, Емануел Макрон, рече дека овој договор мора да го означи крајот на војната и почетокот на политичко решение засновано на решението за две држави, додавајќи дека Франција ќе продолжи да води разговори со меѓународните партнери за да бара политичко решение за војната.

„За ова денес попладне во Париз ќе разговараме со нашите меѓународни партнери“,

истакна Макрон.

Италијанската премиерка Џорџа Мелони порача дека договорот утврден со планот на американскиот претседател Доналд Трамп претставуваат единствена можност за завршување на овој конфликт што мора да се искористи.

„Затоа, ги повикувам сите страни целосно да ги почитуваат веќе договорените мерки и да работат на брзо спроведување на следните чекори предвидени во мировниот план“,

истакна Мелони, додавајќи дека Италија ќе продолжи да ги поддржува напорите на медијаторите и е подготвена да придонесе за стабилизација, реконструкција и развој на Газа.

©2025 360 степени, Сите права се задржани