Бугарскиот историчар Стефан Дечев е дециден дека не е разумно тоа што Бугарија ја запира европската интеграција на С Македонија. Во интервју за бугарскиот портал „Факти“, Дечев подвлекува дека и двете држави треба сериозно да се замислат и да преземат активности за да се надминат недоразбирањата.
„Веќе сум го кажал тоа, но еве пак ќе повторам. Многу е важно Бугарија да се откаже од тоа сфаќање, дека 100% од историската вистина е на бугарска страна и дека Македонците само треба да го препишат бугарскиот историски наратив. А Скопје, македонските политичари и македонската историографија треба да се простат од убедувањето дека ќе може да го поминат целиот процес на преговори без да има критички осврт на македонскиот историски наратив. Ако не се заземат такви позиции, од двете страни, ќе нема деблокада на преговорите. Како почетна позиција, неопходно е Софија да заземе покатегоричен став за нешто кое многу пати е веќе кажано- дека Бугарија ја признава реалноста, или поточно постоењето на македонската нација и на македонскиот јазик. Од друга страна, Скопје треба да се врати на дијалогот во Историската комисија, мислам со методологијата и начинот на работа што доминираше во оваа комисија до февруари 2019 година. Со таков пристап, мислам дека за две години, основните историските проблеми може да се решат“,
вели Дечев во интервјуто.
За него е добро што премиерите Борисов и Заев при последниот телефонски разговор (во понеделникот н.з) се согласиле дека решенијата кои двете држави треба да ги преземат во духот на Договорот за добрососедство и пријателство не смеат да се одложуваат во име на минатото на двете земји кое треба да биде основа на заедничката иднина во ЕУ.
„Деблокадата според мене е можна само ако бугарската страна се врати кон Договорот и се повлече од Рамковната позиција и од Декларацијата на парламентот, а од македонска страна, да се обезбеди враќање на нејзините членови на масата на која се води дијалогот во Заедничката комисија, на начинот на кој таа работеше до февруари 2019. Тогаш и беа усвоени формулации кои ги задоволуваат и двете страни во однос на заедничките личности што двете земји официјално ги чествуваат, како Цар Самоил, Кирил и Методиј, Климент Охридски и т.н.“,
смета Дечев.
Иако не сака да коментира за политика, особено во предизборието во Бугарија, прашан како врз бугарско-македонските односи би влијаел влезот на партијата на шоуменот Слави Трифонов „Има таков народ“ во идната бугарска влада, Дечев оценува дека партијата ја поддржуваат претежно помладите, кои се израснати во период во кој на сосема друг начин ја оформиле својата претстава за Македонија.
„Во таа смисла, сметам дека тоа би отворило можност за поголем маневар на идната влада која би требало да преземе некакво решение за да ги деблокира преговорите меѓу Софија и Скопје“,
укажува бугарскиот историчар Дечев во интервјуто за „Факти.бг“.