Дали корекцијата во документот што го усвои бугарскиот парламент, направена во последен момент пред гласањето, е поврзана со обраќањето на Османи и дали може да се толкува во насока на оставање простор за компромисно решение според апелот на шефот на дипломатијата или само го бетонира ставот на Софија, засега не е јасно
По околу три и пол часа дебата, бугарското Народно собрание, со 170 гласа „за“, 37 „против“ и 21 „воздржан“, предмалку усвои декларација со која, како што се наведува во текстот, се утврдуваат условите под кои Република Бугарија може да ги поддржи следните чекори во процесот на европска интеграција на Република Северна Македонија. За неа гласаа пратениците на ГЕРБ, Демократска Бугарија, ДПС и Продолжуваме со промените.
Одлуката, во суштина, значи прифаќање на францускиот предлог, под одредени услови. Тоа е и ревизија на досегашната официјална бугарска позиција во однос на евроинтеграцискиот процес на Северна Македонија.
Во последен момент беше интервенирано во една од одредбите на предлогот поднесен од лидерот на Демократска Бугарија, Христо Иванов, која се однесува на споменувањето на Договорот од 2017 година и протоколите што произлегуваат од него во Преговарачката рамка.
Имено, во предлогот што вчера помина на Комисијата за надворешна политика во бугарскиот парламент, конкретната одредба, која е меѓу условите под кои Народното собрание ѝ дава мандат на владата да го одобри францускиот предлог, гласеше:
– вклучување референца за двостраните протоколи според член 12 од Договорот за пријателство, добрососедство и соработка во Преговарачката рамка.
Со корекцијата што беше направена денеска на пленарната седница, оваа одредбата беше преформулирана на следниот начин:
– впишување референца за Договорот за пријателство, добрососедство и соработка од 2017 година и протоколите од заседанијата на заедничката комисија по член 12 од тој договор во Преговарачката рамка, во врска со одобрувањето од Советот на ЕУ на заедничките позиции за меѓувладините конференции ЕУ-Република Северна Македонија.
Корекцијата во оваа одредба коинцидира со фејсбук-објавата од изутринава на министерот за надворешни работи на Северна Македонија, Бујар Османи, во која порача:
„Два збора стојат помеѓу успехот и неуспехот на Европската унија во регионот. Зборот ‘протокол’ во рамката, како парадигма на историските прашања, и зборот ‘отворање’ во параграф шест од заклучоците на советот. И двата збора не се во францускиот предлог како финални решенија туку се ставени (дел од нив и во заграда) како прашања за кои не може да се постигне согласност поради позицијата на Република Бугарија. Усвојувањето денес на резолуцијата во бугарскиот парламент, во која се потенцираат токму овие две прашања, ќе го блокира долгорочно европскиот процес и, воедно, ќе ги парализира инструментите од договорот за пријателство на долг рок“,
напиша Османи.
Дали корекцијата во документот што го усвои бугарскиот парламент, направена во последен момент пред гласањето, е поврзана со обраќањето на Османи и дали може да се толкува во насока на оставање простор за компромисно решение според апелот на шефот на дипломатијата или само го бетонира ставот на Софија, засега не е јасно.
Во другите услови што беа дел и од првичниот предлог пишува:
-пречистување на текстот на предлог-заклучоците на Советот, така што ќе гарантира впишување на Бугарите во Уставот на РСМ во одредбите во кои се споменати и други народи и на рамноправна основа со тие народи;
-подобрување на предлог-Преговарачката рамка и предлог-заклучоците на Советот се со цел појасно одразување на ставот дека ништо во процесот на пристапување на РСМ во ЕУ не може да биде толкувано како признавање од Република Бугарија на постоењето на „македонски јазик“;
-гаранција дека добрососедството останува хоризонтален критериум во рамките на целиот процес на присоединување на РСМ кон ЕУ за чие исполнување Европската комисија да го информира Советот пред секоја меѓувладина конференција.