Организаторите на настанот го осудија отсуството на бугарската амбасадорка на конеференцијата велејќи дека тоа е показател на обидите на нејзината влада да се „обели“ депоратцијата на 11 000 Евреи од територијата на денешна Северна Македонија
Амбасадорката на Бугарија во Израел не се појави на минатонеделната конференција за историјата на бугарскиот холокауст. Портпаролот на бугарската амбасада за Еврејската телеграфска агенција изјавил дека амбасадорката Румијана Бачварова добила „покана во последен момент да присуствува конференцијата“ и дека таа „решила дека е добро разговорите и дискусиите да останат на експертско ниво, без какво било политичко присуство или учество“.
Тридневниот настан, насловен „Прогонство и соработка, спасување и преживување: Нови перспективи во врска со Бугарија и Холокаустот 80 години подоцна“, беше организиран од Јад Вашем, Универзитетот Бар-Илан и Кинотеката во Тел Авив токму на 80-годишнината од протестите во Бугарија со кои е спречена депортацијата на бугарското еврејско население.
Но, истакнати историчари не забораваат да потсетат дека кралот Борис III пратил повеќе од 11 000 други Евреи во нацистичките логори од подрачјата окупирани од Бугарија, а кои се денешна Северна Македонија. Тоа е приказна со која Бугарија не сака да се соочи, велат критичарите.
„Ужасната вистина е дека бугарската влада на кралот Борис III, а не нацистичка Германија собрала 11 343 Евреи од Македонија, Тракија и Пирот и свесно ги испратила да бидат убиени во Треблинка. Тоа е историски настан што не бара дополнително појаснување. Со одбивањето дури и да ги поздрави учесниците на конференцијата, амбасадорката Бачварова, можеби дејствувајќи по наредба, се чини дека има намера да продолжи со замаглувањето на историјата на нејзината влада со континуираното одбивање да признае дека Бугарија ја има крвта на овие 11 343 Евреи на својата совест“,
изјави историчарот Менахем Росенсафт за Еврејската телеграфска агенција.
Еден од организаторите на настанот и режисер, Џеки Комфорти, инаку автор на „Украдениот наратив на бугарските Евреи и холокаустот“ и режисер на филмот за тоа како Бугарија го спречи Хитлер, вели дека пристапот на Бачварова кон историјата е „пропагандно ориентиран“.
Според него, наративот во бугарските „неонацистички кругови“ е дека „Евреите не се благодарни што биле спасени“. Комфорти потврди дека Бачварова претходно била поканета да даде повратна информација за неговиот филм посветен на овој историски настан, но дека таа одговорила дека нема да дојде бидејќи тоа е антибугарски настан.