Бугарија се подготвува да донира околу 50 илјади вакцини против ковид-19 за С Македонија. Ова го најави бугарскиот министер за здравство, Стојчо Кацаров, пренесува МИА од Софија.
Според Кацаров, Бугарија досега донирала 172 илјади дози вакцини за Кралството Бутан и 50 илјади дози на Босна и Херцеговина, а се подготвува да продаде 100 илјади дози на Кралството Норвешка и околу 550 илјади дози на Португалија.
Пред Националното собрание, бугарскиот министер за здравство рече дека официјална Софија презела чекори за купување сосема нова австриска вакцина, која сè уште чека одобрување за употреба.
Кацаров уверува дека на населението во Бугарија му се обезбедува доволен број лекови против ковид-19 до крајот на годината, како и за 2022-2023 година и затоа Бугарија може да си дозволи да донира и продаде одредени количини за да не истече нивниот рок на употреба.
Неодамна, Кацаров за Бугарското национално радио изјави дека над два милиони бугарски државјани се вакцинирани со првата доза, а нешто повеќе од милион граѓани ја примиле втората доза.