Амбасадорката во објава на социјалната платформа Икс, ја сподели пораката во која министерот за надворешни работи и надворешна трговија го осуди случајот и во која наведе дека станува збор за инцидент кој е крајно неприфатлив
Амбасадорката на Израел во земјава, Вивиен Аисен му се заблагодари на шефот на македонската дипломатија Тимчо Муцунски за осудата на обидот за опожарување на објектот на Еврејската заедница во Македонија и на синагогата, наведувајќи дека брзата истрага за пронаоѓање на одговорните е од суштинско значење за спречување на потенцијални инциденти во иднина.
Амбасадорката во објавата на социјалната платформа Икс, ја сподели пораката во која министерот за надворешни работи и надворешна трговија го осуди случајот и во која наведе дека станува збор за инцидент кој е крајно неприфатлив.
„Ви благодарам, министре. Брзите и решителни акции на македонските власти за истрага и повикување на одговорните за овој гнасен антисемитски чин се од суштинско значење за спречување потенцијални идни инциденти“,
напиша израелската амбасадорка во Македонија.
Thank you, Minister. The swift and decisive actions of the Macedonian authorities to investigate and hold accountable those responsible for this despicable antisemitic act are essential to preventing potential future incidents. https://t.co/WSwTrDr9IU
— Vivian Aisen 🇮🇱 (@VivianAisen) April 13, 2026
Претходно таа на социјалните мрежи сподели видео од инцидентот и ги повика надлежните да го расветлат случајот. На видео-снимката се слушаат гласови како го анализираат видеото од безбедносните камери на објектот на Еврејската заедница и синагогата, обидувајќи се да утврдат колку лица се присутни пред објектот и ја прескокнуваат оградата.
Министерот за надворешни работи и надворешна трговија, Тимчо Муцунски во објавата на Икс наведе дека за вакви дела нема место во Македонија и дека нашето општество цврство стои на ставовите за толеранција и мултиетнички соживот.
Тој додава дека истрагата за случајот е во тек, а учесниците ќе бидат повикани на одговорност.
За обидот за палење на објектите вчера од Еврејската заедница во Македонија рекоа дека е не е само напад врз верски објект, туку длабоко вознемирувачки удар врз темелните вредности на цивилизираното општество – соживотот, достоинството и заемната почит.
Во соопштението се вели дека во последните години се засилуваат појавите на говор на омраза, нетолеранција и опасно поистоветување на Евреите со сложените геополитички случувања на Блискиот Исток. Од Заедницата сметаат дека таквите тенденции не се само погрешни, туку и длабоко неправедни и го отвораат патот за оживување на антисемитизмот.
Со реакција се јави и Европскиот еврејски конгрес од каде велат дека таргетирањето синагога е напад врз верската слобода и врз безбедноста на еврејските заедници.
„Според локалните извештаи, две лица ја запалиле вратата пред да избегаат. Полицијата врши истрага за инцидентот и се засилени безбедносните мерки. Овој инцидент ја одразува континуираната ранливост на еврејските локалитети во Европа каде што местата за богослужба и животот во заедницата остануваат во опасност. Најостро го осудуваме овој напад и очекуваме одговорните да бидат индетификувани и да одговараат, како и да се обезбеди соодветна заштита на еврејските институции“,
се вели во објавата на Европскиот еврејски конгрес.
Претседателката на државата Гордана Сиљановска-Давкова, по седницата на Советот за безбедност на 1 март годинава, наведе дека „ширум светот определени објекти како синагоги или седишта на еврејската заедница или Музеј на холокаустот, како кај нас, може да бидат под закана“ и оти „ затоа, треба да им се посвети посебна грижа и внимание“.
„Добивме информации од надлежните дека ги следат овие процеси и дека се по заштита и контрола овие објекти, што знали не треба да очекуваме изненадувања“,
рече тогаш претседателката Сиљановска-Давкова.