Полицијата соопшти дека бројот на жртвите може да се зголеми бидејќи комуникацијата е невозможна во неколку градови и села, иако во тек е голема операција за чистење
Најмалку 375 лица загинаа по налетот на тајфунот на Филипините, најсилниот годинава во оваа земја, соопштија локалните власти. Најмалку 56 лица, пак, сè уште се водат како исчезнати, а 500 се повредени.
Полицијата соопшти дека бројот на жртвите може да се зголеми бидејќи комуникацијата е невозможна во неколку градови и села, иако во тек е голема операција за чистење.
Населението во неколку провинции во централниот дел на земјата се соочува со сериозни проблеми, бидејќи нема струја, а телефонските линии се во прекин.
Тајфунот Раи во петокот ги погоди Филипините, при што ветерот достигна брзина од 195 километри на час, а во саботата се оддалечи кон Јужното Кинеско Море.
Многу луѓе загинаа при паѓање на дрвја, уривање на ѕидови и лизгање на земјиште.
Илјадници лица беа евакуирани од селата во ризичните области, со што се спречи бројот на загинати да биде значително поголем.
Тајфунот погоди околу 700 000 луѓе, од кои 400 000 се префрлени во засолништа.