Во делот од реакцијата во која му се обраќаат на Министерството за образование и наука, на Владата и на сите останати надлежни институции, од БРО велат дека нема да прифатат никакво решение во врска со просториите на нивната институција доколку во процесот не се вклучени нивни претставници и доколку, како што велат, не бидат земени предвид сите потреби и специфики поврзани со дејноста на Бирото за развој на образованието
Непосредно пред денешниот протест на студентите и раководството на ФИНКИ на кој најавија дека ќе бараат решавање на нивниот просторен проблем и дислоцирање на Бирото за развој образованието и времено или трајно користење на нивните простории, со писмена реакција се јавија од БРО. Оттаму оценија оти Факултетот за информатички науки и компјутерско инженерство се дрзнал да дава произволни решенија за просториите на Бирото, само за привремено да си го реши, како што велат, својот сопствен просторен проблем.
„И покрај тоа што Управата за имотноправни работи при Министерството за финансии, како и Агенцијата за катастар на недвижности дадоа негативни мислења на нивното барање и се во прилог на задржување на просториите од страна на Бирото за развој на образованието, ФИНКИ продолжува решението на сопствениот проблем да го бара во ‘преселување’ на друга институција, наместо да ги ‘притиска’ надлежните институции да им се доизгради започнатиот објект во Универзитетскиот кампус (или оној објект, исто така, наменет за нив, во кампусот на ПМФ) и трајно да го реши просторниот проблем“,
наведуваат од Бирото за развој на образованието во писмената реакција.
Во писмената реакција на БРО се додава оти тие го поддржуваат ФИНКИ во неговите заложби за обезбедување соодветни услови за настава на студентите и за трајно решавање на својот просторен проблем, наместо, како што велат, за својот проблем да бараат привремено решение во просториите на Бирото во кои нема услови за настава.
„Ги информираме сите институции и јавноста дека Бирото за развој на образованието ќе продолжи да ги извршува сите активности и работни задачи согласно своите надлежности, како и досега, на иста локација, во просториите на ул. ‘Руѓер Бошковиќ’ бр. 20. Сѐ додека не се изгради објект според потребите и надлежностите на институцијата, согласно бројот на вработени и согласно услугите што ги пружа на повеќе од 23 000 наставници нема да дозволиме ‘селење во непознат правец’ без соодветни услови за работа, со рушење на достоинството и на институцијата и на вработените“,
се наведува, меѓу другото, во реакцијата на БРО.
Во делот од реакцијата во која му се обраќаат на Министерството за образование и наука, на Владата и на сите останати надлежни институции, од БРО велат дека нема да прифатат никакво решение во врска со просториите на нивната институција доколку во процесот не се вклучени нивни претставници и доколку, како што велат, не бидат земени предвид сите потреби и специфики поврзани со дејноста на Бирото за развој на образованието.
„Во спротивно, иако за нас неприфатливо, но според ‘обрасците’ на однесување во државата и решавање на проблемите со притисоци, информираме дека ќе ги запреме нашите секојдневни активности и ќе ги повикаме на поддршка сите соработници (наставници, директори, воспитувачи, стручни соработници…)“,
заклучуваат од БРО.
Реакцијата на Бирото за развој на образованието следува откако студентите и раководството на ФИНКИ најавија дека денеска ќе излезат на протест пред Владата на кој од властите ќе бараат решение за својот просторен проблем, како и дислоцирање на БРО за времено или трајно користење на нивните простории.