Опасен преседан, спротивен на европските вредности – вака српската премиерка Ана Брнабиќ ја оцени блокада на евроинтегративниот процес на С Македонија. Според неа ЕУ-интеграциите не треба да се поврзуваат за билатерални прашања, или ако се поврзуваат, како што рече, треба јасно да биде дека тие билатерални прашања треба да се решат за да не се внесуваат во ЕУ.
„Мислам дека билатералното прашање и интерпретацијата на потеклото на јазикот или историјата не е билатерално прашање што треба да ја засега ЕУ. Затоа мислам дека е лош преседан и се надевам дека во иднина нема да има такви преседани, но се плашам дека има можност да ја отвори Пандорината кутија. Но ако се продолжи со такви европски вредности , тоа е сосема спротивно на она што јас го сметам за европски вредности.“
рече Брнабиќ.
Брнабиќ потенцира дека Србија ја поддржува С Македонија на патот кон ЕУ и изрази надеж дека земјава до крајот на годината ќе добие датум за отпочнување преговори. Според Брнабиќ, за стабилноста на регионот е важно сите земји од соседството во релативно ист временски период да станат дел од европското семејство.
Една од темите за кои дискутирале на средбите во рамки на „Преспа дијалогот“ била иницијативата „Мини Шенген“, како и за укинувањето на роамингот меѓу земјите од Западен Балкан кое стартуваше на 1 јули.
„Една од најубавите работи што ми се случија денеска е кога пристигнав на охридскиот аеродром и ми стигна порака дека повеќе не плаќаме за роаминг, дека во целиот регион цените се како дома. Се сетив дека токму тоа го направивме ние“,
додаде Брнабиќ.