Џонсон ќе се сретне со Зеленски за да разговараат за десетиците илјади руски војници во близина на украинската граница, за кои Западот стравува дека се подготвуваат да нападнат
Британскиот премиер Борис Џонсон денеска ќе ја посети Украина како дел од дипломатските напори за спречување можна руска инвазија на земјата.
Како што пренесуваат странските агенции, Џонсон ќе се сретне со украинскиот претседател Владимир Зеленски за да разговара за десетиците илјади руски војници во близина на украинската граница, за кои Западот стравува дека се подготвуваат да нападнат.
Според соопштението од кабинетот на британскиот премиер, тој со Зеленски ќе разговара за стратешката поддршка што Британија може да и ја понуди на Украина.
Соединетите Американски Држави, ЕУ и Велика Британија велат дека Русија има способност да дејствува против Украина, а Џонсон предупреди на катастрофа доколку Москва го стори тоа.
„Ја повикуваме Русија да се повлече и да се вклучи во дијалог, со цел да се најде дипломатско решение и да се избегне понатамошно крвопролевање. Право на секој Украинец е да определи како ќе биде управуван. Како пријател и демократски партнер, Британија ќе продолжи да го поддржува суверенитетот на Украина над оние кои сакаат да ја уништат“,
рече Џонсон пред да отпатува за Украина.
Велика Британија во понеделникот соопшти дека секоја руска акција против Украина ќе предизвика санкции без преседан против руските компании и луѓето тесно поврзани со Кремљ.