– Страдањето и гладот што се случуваат во Газа се неописливи и неодбранливи. Иако ситуацијата е тешка веќе некое време, таа достигна нови длабочини и продолжува да се влошува. Сведоци сме на хуманитарна катастрофа, изјави Кир Стармер
Премиерот на Обединетото Кралство, Кир Стармер, изјави дека ќе одржи итни разговори со Франција и Германија за ситуацијата во Газа, откако над 100 хуманитарни организации повикаа владите во светот да интервенираат.
Тој рече дека ситуацијата е тешка веќе некое време во Газа, но сега кризата е продлабочена.
Стармер, исто така, е под сè поголем притисок да го исполни ветувањето на Лабуристичката партија за признавање на државата Палестина.
„Страдањето и гладот што се случуваат во Газа се неописливи и неодбранливи. Иако ситуацијата е тешка веќе некое време, таа достигна нови длабочини и продолжува да се влошува. Сведоци сме на хуманитарна катастрофа“,
изјави Стармер.
Според неговите најави, тој утре ќе одржи состанок со челниците на најмоќните европски држави, за тоа што можат итно да направат за да се запре убивањето и да се обезбеди храна која очајно е потребна.
„Сите се согласуваме за итна потреба Израел да го промени курсот и без одлагање да дозволи влез на очајно потребната помош во Газа“,
рече Стармер.
Неколкунеделните разговори во Катар за обид да се обезбеди прекин на огнот меѓу Израел и Хамас не донесоа поголеми пробиви. Американските и израелските преговарачки тимови вклучени во напорите за обезбедување прекин на огнот меѓу палестинското милитантно движење Хамас и Израел во Појасот Газа се повикани дома, што е знак дека разговорите можеби се на работ на неуспех.
Стив Витков, специјалниот пратеник на администрацијата на Трамп денеска соопшти дека САД ги прекинуваат разговорите за прекин на огнот во Газа и го враќаат својот преговарачки тим дома, а тоа им го препишуваат на милитантите од Хамас.
Стармер во меѓувреме, рече дека прекинот на огнот ќе обезбеди пат за признавање на палестинска држава, додека се соочува со повици да го стори тоа веднаш.
„Јасни сме дека државноста е неотуѓиво право на палестинскиот народ. Прекинот на огнот ќе нè стави на пат кон признавање на палестинска држава и решение со две држави што ќе гарантира мир и безбедност за Палестинците и Израелците“,
рече тој.
Францускиот претседател Емануел Макрон се заложи за признавање на палестинската државност во неодамнешниот говор пред парламентот на Велика Британија, велејќи дека тоа е единствениот пат до мир.
Македонските народни претставници пак, денеска не поддржаа резолуција со која од Израел ќе се бара да ја деблокира испораката на хуманитарна помош во појасот Газа.