Првиот човек на британската дипломатија Дејвид Лами рече и дека предупредувањата на Путин кон Западот дека доколку ѝ дозволат на Украина да користи ракети за долг дострел постои можност за нуклеарна војна се „фрлање песок во очите“
Во интервју за Би-би-си, еден ден по средбата на британскиот премиер Кир Страмер и американскиот претседател Џо Бајден, министерот за надворешни работи на Обединетото Кралство, Дејвид Лами, рече дека западниот свет не смее да дозволи Владимир Путин да ги исфрли од колосек со своите закани.
Тој рече дека предупредувањето на Путин за нуклеарна војна доколку Украина добие дозвола за користење ракети за долг дострел од американско и британско производство претставува само „фрлање песок во очите“.
„Тој се заканува кога станува збор за тенкови, се заканува кога станува збор за проектили и нуклеарно оружје, но не можеме да дозволиме да нè исфрли од колосек“,
рече Лами.
Дополнително, вели дека за употребата на ракети со долг дострел на Киев си уште е тема на разговор помеѓу сојузниците оти, како што кажа, Путин е империјалистички фашист кому, ако му се дозволи да победи во Украина, нема да запре со воената агресија во иднина.
Инаку, претходно средбата на американскиот претседател Џозеф Бајден и британскиот премиер Кир Стармер во Вашингтон не донесе новости во однос на барањето на украинскиот претседател Володимир Зеленски за користење западно оружје – ракети со долг истрел кои Украина би ги користела за напади врз Русија, јави Би-би-си.
Ова значи дека, барем засега, САД и Обединетото Кралство нема да ѝ дозволат на Украина да користи ракети од нивно производство за напади врз цели и градови во Русија и покрај барањата на Зеленски, кој неколкупати претходно говореше дека тоа е единствениот начин да се стави крај на војната која трае нешто повеќе од две и пол години.