За два дена, во Британија ќе се одржат избори, кои нема да одредат само кој ќе управува со земјата во следниот период, туку и како, а можеби и дали земјата ќе ја напушти ЕУ.
Право на глас на изборите за 650 пратенички места имаат околу 46 милиони Британци. Партијата која ќе освои апсолутно мнозинство ќе формира влада, а нејзиниот лидер станува премиер. Доколку ниту една партија не освои доволен број пратенички места, онаа која има најмногу, може да се обиде да формира малцинска влада или коалициска со некоја друга партија.
Конзервативците стартуваат со најголемо мнозинство
Владејачките конзервативци во моментот на распишување на изборите имаа 298 пратеници, што значи дека за мнозинство им недостасувале повеќе од 20. Губењето на мнозинството по девет години власт ги доведе конзервативците до тоа ситуација, премиерот Борис Џонсон да не може да обезбеди поддршка за мерките потребни за излез од Унијата. Џонсон тврди дека во случај да победи „ќе го спроведе Брегзит“.
Опозициските лабуристи го дочекаа распуштањето на Парламентот со 243 пратеници, а кампањата ја водеа со ставање на Брегзит во втор план, фокусирајќи се на поголеми давачки за здравството, образованието и социјалната помош, национализирање на некои клучни индустрии и комунални услуги, како и ветување дека сите Британци ќе добијат бесплатен пристап до интернет.
Проевропските опозициски партии, Либералните демократи, Зелените и велшката партија Плејд камри, се во сојуз заради тактичко гласање и нема да се натпреваруваат едни против други во десетина изборни единици, за да ја направат поизвесна победата на проевропските кандидати. Шкотската национална партија (СНП), со 35 пратеници и трета сила во досегашниот состав, не е дел од т.н. „Сојуз за останок“ иако е против Брегзит.
Неодамна формираната Партија Брегзит немаше претставници во Парламентот, а својата желба од ЕУ да се излезе без договор околу условите за „развод“ ќе се обиде да ја исполни со повлекување на своите кандидати од над 300 изборни единици каде во 2017 година победиле конзервативците.
Според засега важечкиот распоред, Велика Британија би требало да ја напушти ЕУ на 31 јануари 2020 година, односно за 53 дена.
Изборите во Велика Британија обично се одржуваат на пролет, кога временските услови се подобри. Последните избори во декември се одржани пред 96 години.
Закани и навреди за кандидатите
Брегзит и некои други прашања ја контаминираа политичката атмосфера до таа мерка што повеќе од 70 пратеници се откажаа од кандидатурата за реизбор. Политичари, без разлика дали се приврзаници или противници на Брегзит, беа мета на навреди и закани. Меѓу оние кои се откажаа од кандидатурите се многу умерени и проевропски конзервативци, лабуристички пратеници кои тврдат дека раководството на нивната партија не се бори против антисемитизмот и веќе видени пратенички кои, исто така, добивале бројни навреди.
Партиите кои се натпреваруваат во сите изборни единици можат за кампањата да потрошат најмногу 19,5 милиони фунти, што е околу 30.000 фунти по изборна единица.