Болсонаро беше на чело на поворката моторџии во Сао Паоло со отворен шлем и без маска, со што ги прекрши правилата на оваа бразилска држава
Бразилскиот претседател Жаир Болсонаро е казнет со 108 долари за учество на мотоциклистички настан во државата Сао Паоло, на кој не носеше маска и не ги почитуваше другите превентивни мерки.
Илјадници моторџии учествуваа вчера на собирот во Сао Паоло. Претседателот на екстремната десница беше на чело на поворката со отворен шлем и без маска, со што ги прекрши правилата на оваа бразилска држава.
Властите во Сао Паоло соопштија дека го казниле Болсонаро со 552 реали (околу 108 долари), како и неговиот син Едуардо, член на Конгресот, и министерот за инфраструктура Тарсисио Гомеш, за неносење маска и непочитување на мерките за физичко растојание за време на настанот.
Болсонаро, кој повика на собири низ цел Бразил, како подготовка за претседателските избори следната година, не ги послуша предупредувањата на гувернерот на Сао Паоло, Жоао Дорија, негов политички ривал, кој кажа дека претседателот ќе биде казнет доколку не ги почитува законите на земјата.
Болсонаро повеќе пати им се спротивстави на Дорија и другите гувернери во врска со мерките што ги воведоа за борба против коронавирусот, бидејќи во Бразил починаа речиси 484 000 лица.
Болсонаро редовно ги критикува мерките за затворање и носење маска и ги промовира лековите, како што е хлорокин, иако студиите не ја потврдуваат нивната ефикасност.
Болсонаро постојано зборува против носењето маска, особено за вакцинираните лица, за кои смета дека не можат да пренесат вирус.