Во толпата, таа се здобила со исеченица на вратот кога ја погодило стаклено пивско шише. Младата девојка во тешка состојба била пренесена во здравствениот дом, но два дена подоцна починала
Млада 23-годишна Бразилка почина во болница во Сао Паоло два дена откако беше повредена во судир меѓу навивачите на Палмеирас и Фламенго. Во пресрет на неделното бразилско дерби меѓу Палмеирас и Фламенго, имаше големи навивачки судири, а 23-годишната Габриела Анели беше тешко повредена додека чекаше да влезе на стадионот „Алијанц Парке“.
Во толпата таа се здобила со исеченица на вратот кога ја погодило стаклено пивско шише. Младата девојка во тешка состојба била пренесена во здравствениот дом, но два дена подоцна починала.
„Благодарам на сите што се молеа за мојата сестра, но таа отиде кај нејзиниот татко во рајот“,
напиша нејзиниот брат Фелипе Анели на Инстаграм.
Во судирите пред стадионот, била нападната и полицијата, која употребила солзавец за да воспостави ред. Солзавецот се проширил на теренот, па судијата морал во два наврати да ја прекине играта во првото полувреме бидејќи играчите почувствувале иритација во очите и во носот. Натпреварот на крајот заврши 1-1.
„Не можеме да прифатиме дека 23-годишна девојка е жртва на варварство во средина која треба да биде забавна. Ја изразуваме нашата солидарност со семејството на девојката и бараме брза истрага за ова злосторство“,
објавија од фудбалскиот клуб Палмеирас на социјалните мрежи.
„Во она што требаше да биде чисто спортски настан, една млада жена го загуби животот на неоправдан начин, што заслужува строга казна“,
напишаа од Фламенго на Твитер.
Претседателот на Бразилската фудбалска асоцијација, Едналдо Родригес, најави дека сите натпревари од 15. коло на бразилското првенство ќе започнат со едноминутно молчење во чест на починатата девојка. Тој додаде дека Здружението ќе соработува со федералната влада и со другите релевантни тела во борбата против навивачкото насилство.
„Фудбалот е страст, а не простор за криминалци кои се инфилтрираат во редовите на навивачите да практикуваат секакви видови насилство“,
изјави тој.
Претставник на Одделот за стратешки полициски операции изјави дека лицето одговорно за фрлањето на шишето е уапсено и ќе одговара за убиство.